"Böyük Qayıdış proqramı Azərbaycanın müstəqillik tarixində ən böyük dövlət layihələrindən biridir". Bu sözləri SİA-ya açıqlamasında siyasi ekspert Aydın Quliyev deyib.
Onun sözlərinə görə, bu proqramın gücü və davamlılığına tam etibar etmək olar, çünki onun arxasında dayanan hərbi, iqtisadi və diplomatik əsaslar son dərəcə möhkəmdir: "Dövlətin gücü bu proqram vasitəsilə açıq-aydın nümayiş olunur və onun sabitliyi, davamlılığı barədə heç bir şübhə yarana bilməz. Qısa müddət ərzində proqramın uğurla həyata keçirilməsi məhz bu gücün təzahürüdür.
Böyük Qayıdışın həm siyasi, həm də təhlükəsizlik baxımından önəmli mesajları var. Təhlükəsizlik aspektində isə iki əsas məqam diqqət çəkir. İlk növbədə, bu proqramla Azərbaycanın 30 ildən artıq Ermənistanın işğalı altında qalmış əraziləri dövlətin tam nəzarətinə qaytarılır və burada müxtəlif sahələr üzrə sıx inteqrasiya təmin edilir. İndi həmin ərazilərdə yeni yaşayış məntəqələri salınır, kəndlər, şəhərlər və qəsəbələr bərpa olunur. Onlarla yaşayış məntəqəsi artıq yenidən qurulub və 50 mindən çox insan—məzunlar, işçilər, müəllimlər, dövlət qurumlarının əməkdaşları—bu bölgələrdə fəaliyyət göstərir.
Azərbaycan dövlətinin bu ərazilərdə möhkəm yerləşməsi onların təhlükəsizliyinin ən əsas təminatçısına çevrilir. Paralel olaraq, aparılan sərhəd delimitasiya prosesləri və Ermənistanın bu danışıqlara məcbur edilməsi regionda sabitliyin möhkəmlənməsinə xidmət edir. Bu, Böyük Qayıdışın təhlükəsizliyini təmin edən vacib faktorlar sırasındadır. Azərbaycan ordusu, xüsusi xidmət orqanları və iqtisadi inkişaf proseslərində iştirak edən qurumlar bu ərazilərin müdafiəsini təmin edir.
Böyük Qayıdış həm də Ermənistana mesajdır: bu ərazilər heç vaxt müdafiəsiz qalmayacaq. Onların təhlükəsizliyi həm hərbi, həm də iqtisadi baxımdan yüksək səviyyədə qorunur. Uzun müddət erməni işğalı altında olmuş bu torpaqlar artıq Azərbaycanın ayrılmaz hissəsi kimi bərpa edilir. Ermənistan üçün isə bu, artıq yalancı illuziyanın sonudur; Azərbaycan dövlətinin mövqeyi dəyişməzdir və bu torpaqlar heç vaxt başqa qüvvələrin təsiri altında olmayacaq".
Politoloq qeyd edir ki, bu proses eyni zamanda dünya ictimaiyyətinə bir siyasi siqnaldır: "Azərbaycan öz ərazilərinin müdafiəsində möhkəm dayanır və heç vaxt geri çəkilməyəcək. Böyük Qayıdış həm təhlükəsizlik, həm də siyasi baxımdan Azərbaycanın qətiyyətini nümayiş etdirir.
Əvvəlcə insanlarda bəzi narahatlıqlar və ehtiyatlar ola bilərdi, lakin artıq bu gün qayıdış prosesi çox təhlükəsiz və rahat şəkildə həyata keçirilir. İnsanlar öz doğma torpaqlarına köç edərkən, bunu paytaxtın bir məhəlləsindən digərinə köçmək kimi asan və səmərəli bir proses kimi yaşayırlar. Həmin ərazilərin tam təminat altına alınması, siyasi və təhlükəsizlik baxımından güvənc verici olması qayıdışın uğurunu təmin edən əsas faktorlardandır.
Nəticə olaraq, Böyük Qayıdış proqramı təkcə insanların doğma yurdlarına dönməsi deyil, həm də Azərbaycanın gücünün, dövlətçiliyinin və regiondakı mövqeyinin möhkəmlənməsinin simvoludur. Bu proqram həm iqtisadi, həm sosial, həm də siyasi sahələrdə Azərbaycanın gələcək inkişafına təkan verəcək və regionda davamlı sülh və sabitliyin təmin olunmasında əsas rol oynayacaqdır".
Bütün xəbərlər Facebook səhifəmizdə
.jpg)
USD
EUR
GBP
RUB
