Özbəkistanda səfərdə olan Azərbaycan jurnalistləri Daşkəndin ən böyük və məşhur ticarət məkanlarından biri olan Çorsu bazarında olublar.
SİA APA-ya istinadən xəbər verir ki, media nümayəndələri bazarın fəaliyyəti və burada formalaşmış qədim ticarət ənənələri ilə tanış olublar.
Jurnalistlərin diqqətini bazarda təqdim olunan məhsulların zəngin çeşidi cəlb edib.
Çorsu bazarında müxtəlif növ meyvə-tərəvəz, quru meyvələr, çərəzlər, ədviyyatlar, düyü, müxtəlif un məmulatları, ət və süd məhsulları, şirniyyatlar, həmçinin Özbəkistan mətbəxinə xas ənənəvi məhsullar satılır. Bazarda yerli istehsal olan məhsullarla yanaşı, müxtəlif məişət və gündəlik istifadə əşyalarına da rast gəlmək mümkündür.
Xüsusilə Özbəkistanın məşhur qovunları, üzümü, narı, quru meyvələri, müxtəlif çərəz və ədviyyatları bazarın əsas məhsulları sırasında yer alır. Burada ənənəvi özbək şirniyyatları və milli mətbəxin müxtəlif nümunələri də təqdim olunur.
Azərbaycan jurnalistləri bazarın müxtəlif bölmələrini gəzərək satıcılarla söhbət edib, yerli ticarət mədəniyyəti və məhsulların qiymətləri ilə maraqlanıblar.
Çorsu bazarı yalnız alış-veriş məkanı deyil, həm də Daşkəndin turistləri cəlb edən tarixi və mədəni həyatını əks etdirən mühüm məkanlardan biri hesab olunur. Azərbaycan media nümayəndələrinin buraya səfəri Özbəkistanın gündəlik həyatı və yerli mədəniyyətlə daha yaxından tanış olmaq imkanı yaradıb.
Bütün xəbərlər Facebook səhifəmizdə
USD
EUR
GBP
RUB