"Konstitusiya və Suverenlik İli" çərçivəsində Milli Məclis və Vəkillər Kollegiyasının (VK) birgə təşəbbüsü ilə aztəminatlı və sosial həssas qruplardan olan şəxslərə pulsuz hüquqi yardım göstərilməsi məqsədilə regionlarda növbəti sosial-hüquqi aksiyalar keçirilib. Bu barədə SİA-ya kollegiyanın mətbuat xidmətindən məlumat verilib.
Bildirilib ki, dekabrın 6-da və 8-də təşkil olunan aksiyalar çərçivəsində Qəbələ və Quba rayonlarında vətəndaşlara pulsuz hüquqi yardımın göstərilməsi təşkil olunub.
Belə ki, Qəbələ rayonu Dövlət Peşə Təhsil Mərkəzində deputat Elşən Musayev, Quba rayonunda isə deputat Anatoliy Rafailovun təşəbbüsü və VK-nın dəstəyi ilə vətəndaşlara pulsuz hüquqi yardımın göstərilməsi təmin edilib.
Aksiyalarda Qəbələ və Quba rayon Vəkil bürolarının vəkilləri tərəfindən ümumilikdə 40-a yaxın vətəndaşa müxtəlif hüquq sahələri üzrə pulsuz hüquqi yardım göstərilib.
Vətəndaşlara inzibati işlər, mülkiyyət hüquqlarının müdafiəsi, torpaq mübahisələri, aliment tələbləri, əlilliyin təyin olunması və digər sosial xarakterli məsələlər üzrə hüquqi məsləhətlər verilib, müraciətlər fərdi qaydada araşdırılaraq aidiyyəti qurumlara yönləndirilib.
Bütün xəbərlər Facebook səhifəmizdə
USD
EUR
GBP
RUB