Şimal-qərb bölgəsində məntəqə seçki komissiyalarının üzvləri seçki günü prosedurları barədə maarifləndirilir - FOTOLAR
Yanvarın 29-na təyin edilmiş bələdiyyə seçkilərinə hazırlıqla əlaqədar yanvarın 19-da ölkənin şimal-qərb bölgəsində yerləşən rayonların seçki dairələrinin dairə seçki komissiyalarında məntəqə seçki komissiyalarının sədr, katib və üzvləri üçün treninqlər başlayıb. Treninqlər aşağı seçki komissiyaları üzvlərinin peşəkarlıq səviyyəsini artırmaq məqsədi daşıyır. SİA xəbər verir ki, 113 saylı Qax-Şəki seçki dairəsinin dairə seçki komissiyasında keçirilən və beş gün davam edəcək treninqlərdə dairənin tərkibinə daxil olan 73 seçki məntəqəsindən 438 nəfər komissiya üzvünün iştirakı nəzərdə tutulur. Məşğələləri Mərkəzi Seçki Komissiyası (MSK) tərəfindən təşkil olunan təlim kursunda iştirak etmiş Qoşqar Paşayev və Coşqun Mirzəbəyov aparırlar.
Treninqlərin birinci günü keçirilən məşğələlərdə dairənin 16 seçki məntəqəsindən 96 nəfər komissiya üzvü iştirak edib. MSK tərəfindən hazırlanmış slaydların və əyani vəsaitlərin köməyi ilə iştirakçılara səsvermə günü məntəqə seçki komissiyaları üzvlərinin rol və vəzifələri, seçki günü prosedurları, səsvermə məntəqəsinin açılması, seçki materialları və avadanlığının, seçki qutularının hazırlanması, səsvermə saatlarında tədbirlər, səsvermə prosesində müstəsna hallar, daşınan seçki qutusu ilə səsvermə prosesi, səslərin hesablanması, səsvermənin nəticələri haqqında protokolun doldurulması və digər məsələlər barədə metodiki məlumat və tövsiyələr verilib.
Dairə seçki komissiyasının sədri Abdukərim Əliyevin verdiyi məlumata görə, dairənin tərkibinə daxil olan 73 seçki məntəqəsinin 60-ı Qaxda, 13-ü isə Şəki rayonunda yerləşir. Seçkilərdə bu dairə üzrə 10 bələdiyyəyə 110 nəfər bələdiyyə üzvü seçiləcək. Bu bələdiyyələrin 8-i Qax, 2-si isə Şəki rayonunun ərazisində fəaliyyət göstərəcək. Qax rayonu üzrə 88, Şəki rayonunun bu dairəyə aid ərazisində isə 22 nəfər bələdiyyə üzvü seçiləcək. Mübarizə aparacaq namizədlərin sayı 260 nəfərdir.
Yanvarın 19-da 110 saylı Balakən seçki dairəsində də aşağı seçki komissiyalarının üzvləri üçün treninqlərə start verilib. Dairə seçki komissiyasının sədri Vahid Əliyev bildirib ki, 4 gün davam edəcək treninqlərdə dairənin tərkibinə daxil olan 46 seçki məntəqəsinin 276 nəfər komissiya üzvü iştirak edəcək. Məşğələlər MSK tərəfindən təşkil olunan treninq kursunda iştirak etmiş Valeh Ocaqverdiyev və Rəcəb Ustayev tərəfindən aparılır. Treninqlərin ilk günündə keçirilən məşğələlərdə 12 seçki məntəqəsi üzrə 72 komissiya üzvü iştirak edib. Seçkilərdə dairə üzrə 11 bələdiyyəyə 123 nəfər bələdiyyə üzvü seçiləcək. Namizədlərin sayı isə 276 nəfərdir.
116 saylı Qəbələ seçki dairəsində də treninqlər MSK tərəfindən tərtib edilmiş xüsusi proqram əsasında aparılır. Dairə seçki komissiyasının sədri Zülfüqar Cəfərovun verdiyi məlumata görə, beş gün davam edəcək treninqlərə dairənin tərkibinə daxil olan 59 seçki məntəqəsinin sədr, katib və komissiya üzvləri olmaqla, ümumilikdə 354 nəfər cəlb edilib. Məşğələləri Mərkəzi Seçki Komissiyası (MSK) tərəfindən təşkil olunan təlim kursunda iştirak etmiş Aqil Kərimov və Xalidə Rəsulova keçirirlər. Məşğələlər zamanı iştirakçılara seçki məntəqələrinin səsverməyə hazırlanması, səsvermə günü prosedurları, səslərin hesablanması, səsvermənin nəticələri haqqında protokolun doldurulması və digər məsələlər barədə metodiki məlumat və tövsiyələr verilir, komissiya üzvlərinin sualları cavablandırılır.
Seçkilərdə dairə üzrə 8 bələdiyyəyə 96 nəfər bələdiyyə üzvü seçiləcək. Mübarizə aparacaq namizədlərin sayı isə 177 nəfərdir.
Maarifləndirici treninqlərə bölgədə fəaliyyət göstərən digər seçki dairələrində də start verilib.
Bütün xəbərlər Facebook səhifəmizdə
USD
EUR
GBP
RUB
