24 may 2016-cı ildə Astanada Qazaxıstan Parlamenti Məclisinin ev sahibliyində TürkPA-nın sosial, mədəni və humanitar məsələlər komissiyasının beşinci iclası baş tutub. Qurumun mətbuat xidmətindən SİA-ya verilən xəbərə görə. Qırğızıstan Parlamentinin millət vəkili və komissiyanın sədri cənab Sadık Şer-Niyazın rəhbərlik etdiyi iclasda üzv ölkələrin millət vəkilləri, eləcə də Türk Şurası və TÜRKSOY-un nümayəndələri iştirak etmişdir. İclasın gündəliyinin "Fəlakət və böhranın idarəedilməsində üzv ölkələr arasında əməkdaşlıq" adlı əsas mövzusuna dair müvafiq hesabat məruzəsi və tövsiyə qərarı Türkiyə Parlamentinin millət vəkili cənab Mustafa Bozkurt tərəfindən təqdim edilib.
Millət vəkilləri təbii fəlakətlərin qarşısının alınması və bərpa prosesi üzrə üzv ölkələr arasında qarşılıqlı fəaliyyət məsələsi, qəza vəziyyətlərinin təsirinin azaldılmasında milli səviyyədə görülən tədbirlər və ölkələr arasında təcrübə mübadiləsinin qaydaya salınmasının vacibliyini qeyd edərək, bu mövzulara dair müzakirələr aparıb.
TürkPA-nın üzvü, millət vəkili Sevinc Hüseynova iclasda texnogen fəlakətlər probleminə də toxunub və bununla bağlı Ermənistanda Metsamor atom elektrik stansiyasından gələn təhlükələr haqqında məlumatı üzv ölkələrin parlamentarilərinin diqqətinə çatdırıb. Həmçinin, millət vəkili aprel ayında cəbhə xəttində baş vermiş qarşıdurma zamanı erməni işğalçıları tərəfindən kimyəvi silahın istifadə edilməsi barəsində də danışıb.
Komissiya üzvlərinə Qazaxıstanın Daxili İşlər Nazirliyinin Fövqəladə Hallar Komitəsinin sədri cənab Vladimir Bekkerin təqdimatında məsələ ilə bağlı Qazaxıstanın milli siyasətinə dair məlumat verilib.
İclas sədr cənab Sadık Şer-Niyazın rejissoru olduğu Qırğız tarixi filmi "Kurmanjan Datka"nın təqdimatı ilə sona çatıb.
Komissiyanın növbəti 6-cı iclası 2017-ci ildə Qırğızıstanda keçiriləcək.
Bütün xəbərlər Facebook səhifəmizdə
USD
EUR
GBP
RUB