Azərbaycanda səfərdə olan ABŞ-ın Arizona ştatı Senatının və Nümayəndələr Palatasının üzvləri noyabrın 16-da Milli Məclisin Azərbaycan - ABŞ parlamentlərarası əlaqələr üzrə işçi qrupunun üzvləri ilə görüşüblər.
Görüşdə Milli Məclisin deputatı, işçi qrupun rəhbəri Səməd Seyidov Azərbaycanda gedən inkişaf prosesləri haqqında qonaqlara məlumat verib. Bildirilib ki, regionun lider dövləti olan Azərbaycanın digər mədəniyyətlərə və dinlərə münasibətdə qədim tolerantlıq ənənələri var. Qədim tarixə, zəngin mədəni irsə malik Azərbaycan bu gün inkişafının yeni mərhələsinə qədəm qoyub.
Qeyd edilib ki, Azərbaycan terrorizmə qarşı mübarizədə ABŞ-a dəstək verən ilk ölkələrdən biri olmaqla yanaşı, terrorun bütün formalarını kəskin şəkildə pisləyir.
Azərbaycan torpaqlarının 20 faizinin Ermənistan silahlı qüvvələri tərəfindən işğal olunduğunu qonaqların diqqətinə çatdıran S.Seyidov deyib ki, Dağlıq Qarabağ münaqişəsi nəticəsində bir milyondan çox azərbaycanlı doğma torpağında qaçqın və məcburi köçkünə çevrilib. O bildirib ki, münaqişənin həll olunmaması regional sabitlik, enerji mənbələrinin inkişaf etdirilməsi, eləcə də iqtisadi və demokratik islahatların həyata keçirilməsi yolunda əsas maneədir.
Görüşdə ölkələrimiz arasında əlaqələrin daha da dərinləşdirilməsi ilə bağlı fikir mübadiləsi aparılıb.
Bütün xəbərlər Facebook səhifəmizdə
USD
EUR
GBP
RUB