Dünya Azərbaycanlılarının III Qurultayında iştirak edən diaspor təşkilatı rəhbərləri hökumət nümayəndələri ilə görüşüb-TƏDBİR-FOTOSESSİYA
Bu gün Dünya
Azərbaycanlılarının III Qurultayında iştirak edən Azərbaycanın diaspor
təşkilatı rəhbərlərinin Azərbaycan hökumətinin nümayəndələri ilə görüşü
keçirilib. SİA-nın xəbərinə görə, görüşdə Diasporla İş üzrə Dövlət Komitəsinin
(DİDK) sədri Nazim İbrahimov, təhsil naziri Misir Mərdanov, iqtisadi inkişaf
naziri Şahin Mustafayev, Dini Qurumlarla İş üzrə Dövlət Komissiyasının rəhbəri
Hidayət Orucov, ombudsman Elmira Süleymanova və digər rəsmi şəxslər iştirak
ediblər.
Tədbiri giriş sözü ilə
DİDK sədri İbrahimov açaraq ölkədə belə bir tədbirin keçirilməsinin dünya
azərbaycanlılarının sonrakı taleyinə mühüm töhfələr verəcəyini söyləyib. O bildirib
ki, iyulun 5-də təşkil olunan qurultayda məruzələr, çıxışlar çox olduğundan
diaspor nümayəndələri ilə hökumət nümayəndələri arasında müzakirələr aparmaq
mümkün olmayıb. N.İbrahimov vurğulayıb ki, ona görə də diaspor rəhbərləri ilə
hökumət nümayəndələri arasında ayrıca görüş təşkil etmək qərarına gəlinib. Komitə
sədri Azərbaycan Prezidenti İlham Əliyevin Dünya Azərbaycanlılarının III
qurultayındakı çıxışının diaspor təşkilatlarının fəaliyyəti üçün proqram
xarakterli olduğunu və bundan hər kəsin müəyyən nəticələr çıxaracağını deyib. O
əlavə edib ki, diaspor təşkilatları gələcək illərdə də Azərbaycanın dünyada
tanıdılması istiqamətində işlər görməlidirlər.
Tədbirin davamında çıxış
edən iqtisadi inkişaf naziri Şahin Mustafayev Azərbaycanın son 20 il ərzində iqtisadiyyat
sahəsində əldə etdiyi uğurlardan danışıb. Azərbaycan iqtisadiyyatının qarşısında
duran prioritet istiqamətlərdən də bəhs edən nazir qeyd edib ki, bunlar
makroiqtisadi sabitliyin qorunub saxlanılması, Azərbaycanın qeyri-neft
sektorunun, tranzit potensialının və ölkənin münbit şəraitindən istifadə edərək
kənd təsərrüfatının inkişaf etdirilməsidir.
Daha sonra çıxış
edən mədəniyyət və turizm naziri Əbülfəs Qarayev xaricdə yaşayan
azərbaycanlıların diaspor işində fəal iştirak etməyə çağırıb. O, həmçinin xaricdə yaşayan azərbaycanlıları
internetdə Azərbaycana qarşı olan kampaniyalarla mübarizə aparmağa dəvət edib:
"Azərbaycan bu gün turizm sahəsini inkişaf etdirmək üçün
müxtəlif tədbirlər həyata keçirir. Hər il dünyanın müxtəlif ölkələrində keçirilən
25-30 turizm sərgisinə qatılıb. Bu gün Azərbaycanın muğamı ilə yanaşı, aşıq
musiqisi və Azərbaycan xalçası da UNESCO-nun Maddi Mədəniyyət İrsi siyahısına
daxil edilib. Bəzən xarici ölkələrdə Azərbaycan xalçaları başqa ad altında
satılır. Mən xaricdə yaşayan azərbaycanlıları çağırıram ki, xarici ölkələrdə
belə bir halla rastlaşanda bu xalçaların UNESCO tərəfindən tanınan Azərbaycan
xalçası olduğunu deməyə, bununla bağlı məsələ qaldırmağa tam hüququnuz var".
Təhsil naziri Misir
Mərdanov isə çıxışında hər bir azərbaycanlının təkliflərini, şikayətlərini
qəbul etməyə hazır olduğunu söyləyib. O, Azərbaycanda səfərdə olan hər bir
qonağın təkliflərini dinləmək üçün onları sabah və o biri gün Təhsil Nazirliyində
görüşlərə və birgə müzakirələr aparmağa dəvət edib.
Tədbirin davamında ombudsman Elmira Süleymanova, Dini Qurumlarla İş üzrə Dövlət Komitəsinin sədri Hidayət Orucov, gənclər və idman nazirinin müavini İsmayıl İsmayılov, millət vəkili Sabir Rüstəmxanlı və digər rəsmi şəxslər də çıxış ediblər. Çıxış nitqlərindən sonra müzakirələr başlanıb. Diaspor nümayəndələri ilə hökumət nümayəndələri arasında geniş fikir mübadiləsi aparılıb.
Bütün xəbərlər Facebook səhifəmizdə
USD
EUR
GBP
RUB