"Davos Ümumdünya İqtisadi Forumu çərçivəsində keçirilən “Avrasiyanın iqtisadi özünəməxsusluğunun müəyyənləşdirilməsi” adlı panel iclası yalnız müzakirə platforması deyil, eyni zamanda Avrasiya məkanında formalaşmaqda olan yeni siyasi-iqtisadi reallıqların bariz göstəricisi kimi qiymətləndirilməlidir. Prezident İlham Əliyevin bu paneldə iştirakı və səsləndirdiyi fikirlər Azərbaycanın regional liderlik ambisiyalarının artıq konkret nəticələr üzərində qurulduğunu açıq şəkildə ortaya qoyur". Bu sözləri SİA-ya açıqlamasında politoloq Anar Əliyev deyib.
Onun sözlərinə görə, Azərbaycan-Ermənistan arasında əldə olunmuş de-fakto sülh Cənubi Qafqaz üçün tarixi dönüş nöqtəsidir: "Otuz ilə yaxın davam edən münaqişə regionu qapalı, riskli və investisiya baxımından cəlbedici olmayan məkana çevirmişdi. Bu gün isə vəziyyət köklü şəkildə dəyişir: sülh artıq abstrakt anlayış deyil, real iqtisadi və sosial nəticələr doğuran praktik mexanizmə çevrilir. Malların daşınması, enerji məhsullarının tədarükü, logistika marşrutlarının işə düşməsi bunu açıq şəkildə sübut edir. Xüsusilə Prezident İlham Əliyevin vurğuladığı məqam — beynəlxalq vasitəçilikdən asılı olmadan milli iradə əsasında sülhə nail olunması — müasir beynəlxalq münasibətlər sistemində nadir hallarda rast gəlinən nümunədir. Bu, bir daha göstərir ki, zəifləmiş beynəlxalq institutlar fonunda regional liderlik, siyasi qətiyyət və daxili konsensus həlledici amilə çevrilir. Azərbaycan bu modeli uğurla tətbiq edərək həm öz suverenliyini bərpa etdi, həm də müharibəni davam etdirmək əvəzinə sülh mərhələsinə keçid etdi.
Digər tərəfdən, Avrasiya məkanında baş verən qlobal rəqabət, enerji marşrutları və ticarət dəhlizləri uğrunda mübarizə Cənubi Qafqazın əhəmiyyətini daha da artırır. Orta Dəhliz, TRIPP layihəsi və yeni nəqliyyat bağlantıları regionu Avropa ilə Asiya arasında əvəzolunmaz körpüyə çevirir. Bu prosesdə Azərbaycanın təşəbbüskar mövqeyi, infrastruktur yatırımları və tranzit siyasəti ölkəni Avrasiyanın əsas logistika mərkəzlərindən birinə çevirir. Panel müzakirələrində səsləndirilən investisiya və sabitlik məsələsi də ayrıca qeyd olunmalıdır. Sülhün uzunmüddətli və dayanıqlı olması xarici sərmayə üçün əsas şərtdir. Bu mənada, Azərbaycan-Ermənistan yaxınlaşması təkcə iki ölkə üçün deyil, bütün region üçün iqtisadi canlanma perspektivi yaradır. Regional əməkdaşlıq formatlarının genişlənməsi, biznes və vətəndaş cəmiyyətləri arasında əlaqələrin qurulması artıq geri dönməz prosesə çevrilir.
Prezident İlham Əliyevin çoxtərəflilik, proteksionizm və iqtisadi suverenliklə bağlı səsləndirdiyi fikirlər isə Azərbaycanın qlobal sistemdə öz yolunu necə müəyyənləşdirdiyini aydın şəkildə göstərir. Azərbaycan nə bir geosiyasi mərkəzdən asılıdır, nə də birtərəfli seçim qarşısında qalır. Əksinə, balanslaşdırılmış və praqmatik siyasət nəticəsində ölkə həm Qərb, həm Şərq, həm də regional tərəfdaşlarla paralel əməkdaşlıq qurur. Davos panelində baş verən müzakirələr göstərir ki, Cənubi Qafqaz artıq keçmişin münaqişə bölgəsi deyil, gələcəyin əməkdaşlıq və inteqrasiya platforması kimi formalaşır. Bu transformasiyanın mərkəzində isə siyasi iradə, strateji baxış və regional məsuliyyət anlayışını önə çəkən Azərbaycan dayanır. Uzunmüddətli perspektivdə bu yanaşma Avrasiyanın iqtisadi və geosiyasi xəritəsində Cənubi Qafqazın rolunu köklü şəkildə dəyişdirə bilər".
Bütün xəbərlər Facebook səhifəmizdə
.jpg "Bütün dünya ÇALXALANIR! - NƏ BAŞ VERİR?")
.jpg "Restoranlarda NƏ BAŞ VERİR?")
.jpg)
USD
EUR
GBP
RUB
