"Avropa Parlamenti uzun illərdir erməni lobbilərinin siyasi oyuncağına çevrilib" - POLİTOLOQ DANIŞDI
"Avropa Parlamentinin Azərbaycana münasibətdə sərgilədiyi mövqe artıq nə insan haqları ilə, nə də obyektivlik iddiası ilə izah oluna bilər. Burada söhbət geosiyasi balanslardan, təhlükəsizlik dilemmasından və ya beynəlxalq hüququn incəliklərindən getmir". Bu sözləri SİA-ya açıqlamasında politoloq Tural İsmayılov deyib.
Onun sözlərinə görə, məsələ daha sadə və bir o qədər də biabırçıdır: "Avropa Parlamenti uzun illərdir erməni lobbilərinin siyasi oyuncağına çevrilib və bu rolu könüllü şəkildə qəbul edib. Azərbaycan regionda sabitlik yaradan, beynəlxalq hüquqa söykənən, suverenliyini öz gücü ilə bərpa etmiş dövlətdir. Məhz bu müstəqil xətt Avropa Parlamentini qıcıqlandırır. Çünki Brüssel üçün itaətkar tərəfdaş daha rahatdır, prinsipial və öz yolunu seçən dövlət isə “problemli” sayılır. Azərbaycan daxili işlərini özü tənzimləyən, qərarlarını kənardan diktə ilə verməyən ölkədir və bu, Avropa Parlamentinin alışdığı model deyil. Ermənistanda müxalifətçilərin, dini xadimlərin və ictimai fəalların həbsi fonunda Avropa Parlamentinin susması təsadüf deyil. Bu susqunluq siyasi korluq yox, sifarişli laqeydlikdir. Çünki erməni lobbiləri Avropa institutlarında illərdir fakt yox, emosiyalar üzərindən siyasət qurur. Avropa Parlamenti isə bu emosional təbliğatın tribunası rolunu məmnuniyyətlə oynayır. Nəticədə insan haqları anlayışı obyektiv meyar yox, milli mənsubiyyətə görə dəyişən etiketə çevrilir.
Azərbaycan isə bütün bu kampaniyalara baxmayaraq, dövlətçilik xəttindən geri çəkilmir. Qanunun aliliyinin qorunması, ictimai-siyasi sabitliyin saxlanılması və milli maraqların müdafiəsi Bakının prioritetidir. Avropa Parlamentinin qərəzli qətnamələri nə Azərbaycan cəmiyyətində legitimlik qazanır, nə də ölkənin real siyasi kursuna təsir edir. Çünki bu sənədlər hüquqi sənəd deyil, lobbi məhsuludur. Açıq desək, Avropa Parlamenti bu davranışı ilə özünü ifşa edir. İnsan haqları bayrağı altında erməni maraqlarını müdafiə edən qurum artıq nə ədalət, nə də dəyər simvoludur. Azərbaycanı tənqid etmək Avropa Parlamentində cəsarət sayılır, Ermənistanı tənqid etmək isə “yolverilməz risk”. Bu isə prinsip yox, riyakarlıqdır.
Azərbaycan bu fondda daha aydın görünür: öz sözünü deyən, öz yolunu gedən və kənar siyasi oyunlara alət olmayan dövlət kimi. Avropa Parlamenti isə getdikcə nüfuzunu yox, qərəzini artıran, lobbilərin səsi ilə danışan institut təsiri bağışlayır. Bu fərq də hər şeyi açıq göstərir".
Bütün xəbərlər Facebook səhifəmizdə
USD
EUR
GBP
RUB