Fəsli Nəbiyev
YAP Gənclər Birliyinin sədr müavini
Prezident İlham Əliyevin Xankəndi şəhərində 15 oktyabr 2023-cü il tarixli nitqi Azərbaycan tarixinə qızıl hərflərlə yazıldı. Həmin gün dövlət başçısı Xankəndi şəhərində Azərbaycan Bayrağını ucaldaraq, xalqımızın uzun illər gözlədiyi Böyük Qələbəni bir daha təsdiqlədi. Bu tarixi hadisə 30 ildən çox davam edən Qarabağ probleminə son qoyulmasının və ölkəmizin ərazi bütövlüyünün bərpasının ən parlaq simvoludur.
Xalqımız illərlə bu anı gözləmiş, müstəqilliyimizin gücləndirilməsi və ərazi bütövlüyümüzün bərpası yolunda əzmkarlıqla çalışmışdır. Prezident İlham Əliyevin rəhbərliyi ilə Azərbaycan son illərdə siyasi-iqtisadi və hərbi sahələrdə böyük irəliləyişlərə imza atdı. Güclü iqtisadiyyat və ordu quruculuğu müstəqilliyin əsas dayaqları oldu. Şanlı ordumuz 2020-ci ildə 44 günlük Vətən müharibəsində özünü tam sübut etdi, düşmən kapitulyasiya aktını imzalamağa məcbur oldu.
Dövlət başçısının çıxışında xüsusi vurğulanan məqam isə antiterror tədbirlərinin qaçılmazlığı idi. Azərbaycan hər zaman sülh yolunu seçmiş, lakin Ermənistanın təxribatları və işğalçılıq siyasəti qarşısında ölkəmiz öz suverenliyini təmin etmək üçün hərbi yola baş vurmalı olmuşdur. Nəticədə, Qarabağdakı ərazilərimiz azad edildi və bu torpaqlar üzərində əbədi olaraq Azərbaycan Bayrağı dalğalanacaq.
Bu möhtəşəm Qələbə xalqımızın yaddaşında əbədi yaşayacaq. Xalqımız tarixi Zəfəri öz qanı və canı bahasına qazandı. Prezident İlham Əliyev bildirdi ki, Azərbaycan xalqı, o cümlədən gələcək nəsillər bu Qələbə ilə hər zaman fəxr edəcək və tariximizdə bu Qələbə əbədi yaşayacaq.
Silahlı Qüvvələrimiz döyüş meydanında qazandığı şərəfli zəfərlə bütün dünyaya gücünü göstərdi. Ordumuzun hər bir əsgəri və zabiti, xalqımızın qürur mənbəyi olaraq ölkəmizin təhlükəsizliyini və müstəqilliyini qorumağa davam edəcək.
Bu tarixi hadisə, həmçinin Ulu Öndər Heydər Əliyevin xalqımıza miras qoyduğu müdrik siyasətin Prezident İlham Əliyev tərəfindən uğurla davam etdirilməsinin parlaq nümunəsidir. Azərbaycanın möhtəşəm qələbəsi tarixdə əbədi olaraq yaşayacaq və hər zaman xalqımızın qürur mənbəyi olacaq. yap.org.az
Bütün xəbərlər Facebook səhifəmizdə
.jpg)
USD
EUR
GBP
RUB