“Meşəlidə evimizdə olarkən qəflətən ermənilərin hücumuna məruz qaldıq. Onlar şüşələrimizi sındırıb evimizi gülləbaran etdilər”. SİA xəbər verir ki, bu sözləri Xocalı rayonunun Meşəli kəndində soyqırımı törətməkdə ittiham olunanlardan biri - Vaqif Xaçatryanın cinayət işi üzrə növbəti məhkəmə baxışında zərərçəkmiş Firuzə Mehralıyeva deyib.
O, sözlərinə belə davam edib: “Ailə üzvlərimizlə birlikdə döşəmənin altında gizlənmişdik. Həmin vaxt ərim Mürsəl ayağından güllə yarası almışdı. Ermənilər evimizin qapısını açıb gülləni mənim üzümə dirəmişdi. Səs-küy salıb kənara çəkildim. Alçaq boylu orta bədənli, zireh dəmir forma geyinmiş maskalı erməni təpiklə mənim sağ böyrümə arxadan bir neçə dəfə vurdu.
Təxminən 3 saat ermənilər evimizi güllə yağışına tutdular. Həmin vaxt evimizdə olan iki polis yaralandı. Onların birinin adı Elçindir, o birini xatırlamıram.
Həmin gün saat 9 radələrində Tofiq Hüseynovun dəstələri gəlib bizi ermənilərin əlindən qurtardı. Həmin gün erməni quldurları kənddə olan dayım oğlu Allahverdi Novruzov, anası Adilə və qızlarını öldürdülər. Allahverdinin oğlunu isə girov götürmüşdülər. O oradan qaçıb qurtuldu və hazırda Bakıda polis işləyir”.
Ayşən Vəli
Bütün xəbərlər Facebook səhifəmizdə
USD
EUR
GBP
RUB