2006-cı ildə Azərbaycanda həyata keçirilən denominasiya prosesi zamanı dövriyyəyə xırda pullar da buraxıldı. Ancaq çox az vaxtda onlar istifadəyə yaramadı. Hazırda 1, 3, 5 qəpiklər lazımsız əşyaya çevrilib və demək olar ki, heç bir alış-verişdə istifadə edilmir. Bu gün yalnız bir necə alqı - satqı mərkəzlərində xırda qəpiklər qəbul olunur. Qalan yerlərdə isə onların qəbul etməkdən imtina olunur. Mütəxəssislər isə xırda nominal pullar dövriyyədə olduğu üçün onların qəbul olunmamağını qanunvericiliyə zidd hal kimi dəyərləndirirlər. Puldan imtina edən şəxs qanunvericiliyə uyğun olaraq cəzalandırıla da bilər.
Məsələ ilə bağlı Mərkəzi Banka suallarımızı ünvanlandıq. Bankın mütəxəssislərinə istinadən mətbuat xidmətinin rəhbəri Namiq Əliyev suallarımızı belə cavablandırdı:
- 1 və 3. 1, 3 və 5 qəpiklərin dəyərinin artırılması istiqamətində hər hansı tədbirlər görülürmü ? Qəpiklərin dəyərinin itirilməsinə səbəb nədir?
- Ümumiyyətlə, pul nişanlarının zaman keçdikcə tədricən dəyərinin itirilməsi inflyasiya ilə bağlıdır. İnflyasiya əsas səbə istehlak malları və xidmətlərinin keyfiyyətinin artmadığı halda qiymətlərin bahalaşmasıdır. Aşağı templi inflyasiya iqtisadi inkişafın labüd nəticəsidir. Bu baxımdan Azərbaycan Respublikasında iqtisadi inkişafı təqib edən mülayim inflyasiya prosesi pul nişanlarının əmtəə və xidmətlər bazarında dəyərinin tədricən itirilməsi ilə nəticələnir. Bu, inkişaf səviyyəsindən asılı olmayaraq hər bir iqtisadiyyat üçün təbii prosesdir.
- Xırda qəpiklərin birdəfəlik dövriyyədən çıxarılması nəzərdə tutulub?
- Mövcud qanunvericiliyə əsasən Azərbaycan Respublikasının bütün pul nişanları, o cümlədən, əskinazlar və xırda nominalı pul nişanları ölkə ərazisində qanuni ödəniş vasitəsidir. Bu pul nişanlarının, o cümlədən , xırda nominallı pul nişanlarının (qəpiklərin ) birdəfəlik dövriyyədən çıxarılması nəzərdə tutulmur.
- Xırda qəpiklərin dəyərini itirməsi hökumətin maliyyə fəaliyyətinə nə dərəcədə zərbə vurur?
- Xırda qəpiklərin dəyərinin itirməsi hökumətin maliyyə fəaliyyətinə hər hansı zərbə vurmur. Təbii proses olaraq xırda nominallı pul nişanlarının istehlak bazarında dəyərinin tədricən itirilməsi ilə paralel nominallar üzrə emissiyanın restrukturizasiyası da həyata keçirilir ki, bu da izafi maliyyə yükü yaratmır.
- Xırda qəpiklərin hazırlanmasına nə qədər vəsait sərf olunur?
- Denominasiya nəticəsində tədavülə 160 min manat məbləğində 1 qəpik, 400 min manat məbləğində 3 qəpik, 1 mln. manat məbləğində 5 qəpik nominallı sikkələr buraxılıb. Onların istehsalı beynəlxalq təcrübəyə uyğun olaraq orta bazar qiymətləri ilə həyata keçirilib.
Bütün xəbərlər Facebook səhifəmizdə
USD
EUR
GBP
RUB