Bakıda tarixdə ilk dəfə Avropa Oyunları çox gözəl və möhtəşəm keçir. Bu möhtəşəmliyin əsas və vacib hissələrindən biri də "Bakı -2015"in loqosudur. "Bakı 2015" I Avropa Oyunlarının loqosunun müəllifi azərbaycanlı dizayner Adəm Yunisovun müsahibəsini SİA oxucularına təqdim edirik:
- Adəm bəy ilk öncə özünüz haqda məlumat verin...
- Adəm Yunisov Hüseyn oğlu 1978 ildə Naxçıvan MR Şərur rayonu Gümüşlü kəndində anadan olmuşam. İlk təhsilimi kənd orta məktəbində, orta təhsilimi Naxçıvan Türk Litseyində tamamladıqdan sonra universitet təhsili üçün Türkiyənin paytaxtı Ankara şəhərinə yollanmışam. Təhsilimdən sonra Ankarada yaşamağa və çalışmağa davam etmişəm. Hələ də Ankara və İstanbul şəhərlərində fəaliyyət göstərən Element Visual Studio şirkətinin rəhbəriyəm.
- "Bakı 2015" I Avropa Oyunlarının loqosunu hazırlamaq ideyası necə yarandı?
- Bakı 2015 I Avropa Oyunları loqosunda yerləşən bütün elementlər bizə, yəni Azərbaycana məxsusdur. Şansım onda gətirdi ki, mən bunları fərqli tərəfdən gördüm və təsvir etdim. Nəticə olaraq, Azərbaycan və dünya tarixində çox qürur duyduğum bir hadisədə adım hallandı.
- Bununla bağlı sizə xüsusi təklif gəlmişdi?
- Xeyir. Bununla bağlı müsabiqə elan olunmuşdu. Mən də çoxları kimi o müsabiqədə iştirak etdim və qalib gəldim.
- Hazırladığınız loqonun köklərində nə dayanır və hansı mənanı daşıyır?
- "Bakı-2015" I Avropa Oyunları loqosunda 5 təməl element yerləşir. Bunlar nar, simurq quşu, alov, dalğa və xalçadır. Bütün elementlər Azərbaycanın dəyərləridir. Nar birlik və bərəkət rəmzidir. Nağıllarımızdan gələn alovdan yaranmış simurq quşu bizim qədim ənənələrimizi və qonaqpərvərliyimizi əks etdirir. Alov, odlar yurdu Azərbaycanı və gücü-qüdrəti təmsil edir. Xəzər dənizinin dalğaları Azərbaycan gənclərini və onların dinamikasını-inkişafını təmsil edir. Xalça bizim mənəvi irsimizi bildirir.
- Sizin hazırladığınız loqo bəyəniləndə necə reaksiya verdiniz?
- Mən 15 ildən çoxdur ki, Türkiyənin nəhəng şirkətləri ilə çalışıram. Bu müddət ərzində bir çox böyük layihələrdə işləmişəm. "Baku 2015" bunlar arasında tamamilə fərqli yerdədir və elə də qalacaq. Bu loqo mənim adımın vətənimlə yanaşı tarixə keçməsinə səbəb oldu. Bu həm bir dizayner olaraq, həm də bir azərbaycanlı kimi çox qürurverici haldır. Sevincimin həddi-hüdudu yoxdur.
- Hazırda deyə bilərik ki, Azərbaycanın hər yerində "Bakı 2015"ə aid plakatlar yer alıb. Bu necə hissdir?
- Qürurverici duyğudur. Ümumiyyətlə indiyə qədər mənim digər dizaynlarım bir çox yerlərdə nümayiş olunub. Amma bu, tamamilə fərqli hadisədir. Mənim dizaynımın ölkənin hər guşəsində yer alması möhtəşəm bir hissdir.
- Deyə bilərik ki, Avropa Oyunlarının açılış mərasiminin müəyyən hissəsi sizin hazırladığınız loqo əsasında qurulmuşdu. Orada xüsusi element varmı ki, o hissə sizə aid deyil və təəssüflənəsiniz ki, onu niyə mən düşünmədim?
- Açılış mərasimini mən də bir tamaşaçı kimi gedib, izlədim. Oradakı fikirlər, təsvirlər möhtəşəm idi. Kaş gələcəkdə buna bənzər bir layihənin bədii rəhbərliyini etmə şansım ola...
- Bağlanış mərasimində tamaşaçıları nə gözləyir?
- Bu mənim üçün də maraqlıdır. Ancaq əminəm ki, "Bakı-2015" I Avropa Oyunlarının bağlanış mərasimi açılış kimi möhtəşəm və füsunkar olacaq.
Bütün xəbərlər Facebook səhifəmizdə
USD
EUR
GBP
RUB