“Beş il öncə torpaqlarımızın azad olunması ilə Azərbaycan xalqı təkcə ərazi bütövlüyünü deyil, həm də öz mədəni kimliyini, tarixi yaddaşını və milli irsini bərpa etdi. Qarabağda aparılan genişmiqyaslı quruculuq işlərinin əsas istiqamətlərindən biri də məhz mədəni irsin dirçəldilməsi, abidələrin bərpası və tarixi mühitin əvvəlki simasına qaytarılmasıdır. Dövlət bu işi yalnız inşaat layihəsi kimi deyil, milli kimliyin və mənəvi varisliyin təntənəsi kimi həyata keçirir”. Bu sözləri SİA-ya açıqlamasında millət vəkili Ülviyyə Həmzəyeva deyib.
Deputat bildirib ki, Prezident İlham Əliyevin rəhbərliyi ilə qəbul edilən dövlət proqramları çərçivəsində Qarabağ və Şərqi Zəngəzur bölgələrində minlərlə tarix və mədəniyyət abidəsinin bərpası üçün elmi əsaslara söykənən layihələr hazırlanıb: “Bu abidələr təkcə memarlıq nümunələri deyil, xalqımızın əsrlərlə formalaşan düşüncə tərzini, həyat tərzini və dini-mənəvi dəyərlərini təcəssüm etdirir. Mədəniyyət Nazirliyi, Qarabağ Dirçəliş Fondu və Heydər Əliyev Fondu bu istiqamətdə genişmiqyaslı fəaliyyət göstərir, yerli və beynəlxalq mütəxəssislərin iştirakı ilə bərpa və konservasiya işlərini həyata keçirir.
Qarabağın incisi Şuşa şəhəri bu prosesin simvoluna çevrilib. Prezident İlham Əliyevin sərəncamı ilə ona “Azərbaycanın mədəniyyət paytaxtı” statusunun verilməsi dövlətin mədəni siyasətində dönüş nöqtəsi oldu. Qısa müddət ərzində burada Molla Pənah Vaqifin muzey-məqbərə kompleksi, Xurşidbanu Natəvanın evi, Üzeyir Hacıbəyovun və Bülbülün büstləri, Yuxarı və Aşağı Gövhərağa məscidləri, Saatlı, Mamayı və Təzə Məhəllə məscidləri bərpa edilərək yenidən xalqın istifadəsinə verilib. Şuşa qalası, Xan qızı bulağı və tarixi küçələr öz ilkin görkəmini alıb. Bütün bu işlər Heydər Əliyev Fondunun, Mədəniyyət Nazirliyinin və Qarabağ Dirçəliş Fondunun birgə təşəbbüsləri ilə reallaşır.
Bərpa olunan abidələr arasında dini irsin xüsusi yeri var. Qarabağda məscidlərin, türbələrin və ziyarətgahların bərpası Azərbaycanın multikultural və tolerantlıq ənənələrinin davamıdır. Ağdam, Füzuli, Qubadlı, Zəngilan və Şuşa rayonlarında onlarla məscid bərpa olunub, ibadət fəaliyyətləri bərpa edilib. Bu abidələrin bərpasında həm yerli ustalar, həm də xarici restavratorlar iştirak edir. Məqsəd abidələrin tarixi simasını qorumaq, eyni zamanda onları gələcək nəsillərə orijinal şəkildə ötürməkdir.
Qarabağ Dirçəliş Fondu bu sahədə mühüm missiya daşıyır. Fondun əsas məqsədi azad edilmiş ərazilərdə bərpa və yenidənqurma layihələrinə maliyyə və texniki dəstək göstərməkdir. Fondun təşəbbüsü ilə mədəni irs xəritəsi hazırlanıb, hər bir rayon üzrə prioritet bərpa obyektləri müəyyənləşdirilib. Heydər Əliyev Fondu isə həm bərpa işləri, həm də mədəni həyatın canlandırılması istiqamətində mühüm təşəbbüslər reallaşdırır. Fondun təşkil etdiyi Vaqif Poeziya Günləri, Xarıbülbül Musiqi Festivalı və Şuşa İncəsənət Günləri Qarabağın mədəniyyətini yenidən dirçəldib, bu torpaqları beynəlxalq mədəniyyət məkanına çevirib.
Mədəni irsin qorunması ilə yanaşı, bərpa olunan abidələr turizmin inkişafına da böyük təkan verir. Artıq Qarabağa turlar təşkil olunur, Şuşa və Zəngilan istiqamətində turist marşrutları hazırlanır, bələdçi proqramları həyata keçirilir. Bu, bölgənin iqtisadi canlanmasına, yeni iş yerlərinin yaranmasına və yerli icmaların sosial rifahının artmasına xidmət edir. Dövlətin planlarına əsasən, yaxın illərdə Qarabağ və Şərqi Zəngəzurda mədəni turizmin əsas istiqamətləri formalaşdırılacaq və bu region beynəlxalq səviyyədə tanınan mədəni irs mərkəzinə çevriləcək.
Azərbaycanın mədəniyyət siyasəti Qarabağda həyata keçirilən işlərlə bir daha sübut etdi ki, bu dövlət üçün mədəni irs təkcə keçmişin xatirəsi deyil, gələcəyin dayağıdır. Bərpa olunan hər abidə, dirçəldilən hər muzey, təmir edilən hər məscid xalqımızın öz köklərinə qayıdışının, milli qürurunun və kimliyinin bərpasıdır. Bu gün Qarabağda ucalan hər bina, bərpa olunan hər divar, işıqlandırılan hər küçə bir ideyanın – Azərbaycanın mədəni və mənəvi dirçəlişi ideyasının daşıyıcısına çevrilib. Beş il ərzində görülən bu işlər göstərir ki, dövlətin diqqət mərkəzində təkcə torpaq deyil, onun ruhu da var. Qarabağda bərpa olunan hər abidə xalqın yaddaşında əbədi iz buraxır və Azərbaycan mədəniyyətinin qüdrətini bütün dünyaya nümayiş etdirir”.
Bütün xəbərlər Facebook səhifəmizdə
USD
EUR
GBP
RUB
