“Zirə”nin kapitanı Anar Nəzirov Topaz Premyer Liqanın 5-ci turunda “Neftçi”yə 1:2 hesabı ilə uduzduqları oyundan sonra jurnalistlərin suallarını cavablandırıb.
-Bütün oyun ərzində üstünlük bizdə idi. Bunu tam əminliklə deyə bilərəm. Yəqin onlar özləri də təsdiqləyərlər. Sadəcə, bəxt “Neftçi”nin yanındaydı.
- Samir Abasovun gəlişindən sonra komandada nə kimi dəyişikliklər hiss olunur?
- Samir müəllim yeni sistem yaratmaq istəyir. “Sumqayıt”dakı oyun üslubunu burada da tətbiq etməyə çalışır. Hazırda da məhz bunun üzərində işləyirik. Düzdür, buna vaxt lazımdır. Amma görünür ki, komanda yavaş-yavaş yeni sistemə öyrəşir. İndi qara zolaqdayıq, çalışıb bundan çıxmaq lazımdır. Bu oyunda da hər şeyi etdik, bəxtimiz gətirmədi. Siz də gördünüz ki, “Neftçi” meydanda yox kimi idi. Qapıya doğru cəmi 2 zərbə vurdular, onlar da qol oldu.
- Nəzərə alsaq ki, “Neftçi” çempionluq uğrunda mübarizə aparır, sən bu cür zəif rəqib gözləyirdin?
- O barədə bir söz deyə bilmərəm. Əsas qalib gəlməkdir.
- Səncə, 2:1 bu oyunun ədalətli nəticəsi idi?
- Məncə, bu gün şans “Neftçi”nin tərəfində idi. Rəqibi qələbə münasibətilə təbrik edirəm. Biz də qalib gələ bilərdik. Ancaq yaratdığımız qol epizodlarında bəxtimiz gətirmədi.
- Samir Abasovun tribunaya göndərilməsi oyununuza nə dərəcədə təsir göstərdi?
- Samir müəllim tribunaya göndərilsə də, yaxında idi. Komandaya yenə də öz tapşırıqlarını verirdi.
- Premyer Liqada keçirdiyiniz 4 oyundan sonra cəmi 1 xalınız var. Problem nədədir?
- Əsas problem qələbə qazana bilməməyimizdir. “Zirə” əvvəllər belə futbol oynamırdı, amma qalib gəlirdi. Deyirsiniz ki, “Neftçi” çempionluq uğrunda yarışır. Belə oynaya-oynaya axırda çempion olacaqlar da. Bu mövsüm keçirdikləri bütün matçlarda 70-ci dəqiqədən sonra belə oynayıblar. Bəlkə bu, baş məşqçinin taktikasıdır, bilmirəm. Amma işə yarayır. Bizə gəlincə, bu durumdan çıxmağa çalışacağıq.
- 4 gündən sonra “Qarabağ”la 1-ci turdan təxirə salınmış oyuna çıxacaqsınız. Səncə, arzuladığınız ilk qələbəni həmin görüşdə qazanmaq olar?
- “Qarabağ” çətin rəqibdir. Çalışacağıq ki, bugünkü oyunu onlara qarşı da göstərək. Əvvəlcədən proqnoz vermək düzgün çıxmaz. “Qarabağ”la oyunda da əlimizdən gələni edəcəyik.
Bütün xəbərlər Facebook səhifəmizdə
USD
EUR
GBP
RUB