YAZMIRAM DAHA
Sevgi şeirləri yazmıram daha
Qənaət edirəm ağ vərəqlərə.
Harda kağız, vərəq düşsə əlimə
Təyyarə düzəldirəm,
Gəmi düzəldirəm
Nəvələrimə.
GECİKMƏYİMİZİN BAŞLICA SƏBƏBİ
Gecikirik, çünki hələ yolumuzu
Gözləyənlər var.
Gözləyən olmasa,
Ürəkdən gecikmək istəsək belə
Gecikəmmərik.
Gecikmək sözüylə gözləmək sözü
Bir-birindən ayrı tam mənasızdır.
BİR GÖZ QIRPIMINDA
Bir gözqırpımında getdin, gözəlim,
Gözümdə əridi üzün qar kimi.
Arxanca çırpındı ayaq izlərim
Sahilə atılan balıqlar kimi.
GÖRDÜN KÖVRƏLMİSƏN
Gördün, kövrəlmisən hönkür-hönkür,
Ağlamağın gəlir içindən,
Ağlama, əzizim, gözlə, qoy gəlim,
Güldürə bilməsəm,
Oturub ağlayaram səninlə birgə.
OVQAT
Havalar soyudu, mən isə sənin
İstini saxlayan yataq kimiyəm.
Titrəyir vücudum, əsir bədənim,
Quşu təzə uçmuş budaq kimiyəm.
Durub pəncərədən baxıram çölə,
Deyirəm ürəyim, daral, keçibdi.
Ruhum dalğalanır, elə bil göləm,
İçimdən indicə maral keçibdi.
GÜNƏŞLİ VƏ KÜLƏKLİ GÜN
Şəfəq sınır qarışqanın
Parıltılı kürəyində...
Niyyət qalır,
Yön dəyişir
Günün tozlu küləyində...
KÜLƏKDƏ YANAN TONQAL
Ocağın üstünə atdıq çırpını,
Havada ayaz var,
yol-cığır buzdu.
Od-alov küləkdə elə çırpınır,
Elə bil can verən, başsız xoruzdu.
Bütün xəbərlər Facebook səhifəmizdə