Azərbaycanın kişi otüstü hokkeyçilərdən ibarət milli komandası İtaliyanın Kataniya şəhərində keçirilən Avropa çempionatında baş mükafata sahib olub. Siasport.az saytı xəbər verir ki, "A" qrupunda yer alan yığmamız Xorvatiya hokkeyçilərinə 6:2 hesabı ilə qalib gəlib və sonra İtaliya komandası ilə matçı 2:2 hesabı ilə başa vuraraq 4 xalla qrupda 1-ci yeri tutub. Hər 2 rəqibi ilə heç-heçə oynayan yarış sahibləri - italiyalılar isə 2 xalla qrup ikincisi kimi yarımfinala vəsiqə qazanıblar.
Reqlamentə görə həmin mərhələdə "A" və "B" qrupunda I və II yerlərə layiq görülənlər "çarpaz" üsulla bir-biri ilə qarşılaşıblar. Azərbaycan millisinin rəqibi Cəbəllütariq hokkeyçiləri olub. Həmyerlilərimiz həmin görüşdə 4:2 hesabı ilə qalib gələrək minimum vəzifə-növbəti mövsümdən qitənin II divizionunda oynamaq hüququnu özlərinə təmin ediblər. Digər yarımfinal görüşündə isə italiyalılar İsveçrə hokkeyçilərindən güclü olduqlarını 3:2 hesablı qələbədə əks etdiriblər. Nəhayət, iyulun 30-da elə bir prinsipial xarakter daşımayan final oyununda Azərbaycan və İtaliya yığmaları qarşı-qarşıya gəliblər. Maraqlıdır ki, 2005-ci ildə Bakıda qadın otüstü hokkeyçiləri arasında keçirilən Avropa çempionatında da bu ölkələrin milli komandaları II divizyondan "elita"ya vəsiqə qazanmışdılar. O zaman bu rəqiblərin final görüşündə meydan sahibləri - Azərbaycan hokkeyçiləri minimal hesabla qalib gəlmişdilər. Ancaq bu dəfə ssenari təkrarlanmadı. Kişi hokkeyçilərin final qarşılaşmasında meydan sahibləri deyil, Azərbaycan hokkeyçiləri qələbə qazanıblar. Final görüşünün əsas vaxtı ilkin qrup mərhələsində olduğu kimi 2:2 hesabı ilə heç-heçə başa çatdığından qalibi müəyyən etmək üçün əlavə vaxtdan (7,5 x 7,5) istifadə olunub. Həmyerlilərimiz əlavə vaxtın 5-ci dəqiqəsində standart cərimə zərbəsindən "qızıl qol" vuraraq 3:2 hesablı qələbə ilə Avropa çempionatının baş mükafatına sahib olublar.
Bütün xəbərlər Facebook səhifəmizdə
USD
EUR
GBP
RUB
