"Serj Sarkisyanın öz siyasi planları barədə konkret fikirlər söyləməkdən inadla qaçması, eyni zamanda bu mövzudan kənar qalmağa göstərdiyi cəhdləri belə qənaətə gəlməyə zəmin yaradır ki, heç də hər şey onun nəzarətində deyil". Bu barədə Ermənistanın aparıcı müxalifətyönlü saytı olan 1in.am saytının analitik bölümündə yazılıb. Analitika şöbəsinin qeyd etdiyinə görə, əgər Serj Sarkisyan az ya da çox, kompleksli şəkildə situasiyanı idarə edə bilsəydi, bu zaman hər şey sözsüz ki, daha dəqiqləşdirilmiş, müəyyənləşdirilmiş şəkildə görünərdi, xüsusilə "möhtəşəm" parlament seçkilərindən sonra: "Lakin bundan sonra da Serj Sarkisyan izlərin itirilməsi ilə məşğuldur. Məsələn, o ümumiyyətlə siyasətdən uzaq olan adamı parlamentin sədri təyin edir ki, həmin adam həkimdir və bu sənəti ilə uzun zamandır məşğul olmur. Hər halda bu həkim hakim Respublika partiyasının deputatlığa namizədlər siyahısında yer aldığından bəri həkimliklə məşğul olmayıb".
Serj Sarkisyanın hərəkətləri onun həqiqi hədəflərini ifşa edir
Erməni saytı həmçinin qeyd edir ki, Serj Sarkisyan öz nəzarət xidmətinə yenidən Ovannes Ovsepyanı təyin edir. Belə ki, Ovanes Ovsepyan Ermənistanın hakimiyyət sistemində seçilən fiqurlarından biridir: "Digər tərəfdən, prezidentin nəzarət xidməti keçici xidmətdir və çox yəqin ki, Ovsepyanın təyinatı Serj Sarkisyanın növbəti "müvəqqəti" qərarıdır. Məhz bu amilin özü də izlərin itirilməsi çərçivəsində yürüdülən taktikalardan biridir".
"Serj Sarkisyanın hərəkətləri onun həqiqi hədəflərini ifşa edir"-deyə qeyd edilən analitik yazıda bildirilir ki, o kimsənin öz planları barədə xəbərdar olmasını istəmir: "Lakin onun məqsədi isə budur ki, heç kim Serj Sarkisyanın nə etdiyini, hansı planlar üzərində işlədiyini bilməməlidir. Bütün bunlar heç də situasiyaya hakim olan insana aid hərəkətlər deyil. Və nə qədər qəribə görünsə də bütün bunlara rəğmən, Serj Sarkisyana situasiyanı idarə etmək müyəssər olur".
Məsələlərin kökü üzərində Ermənistanın siyasi həyatının anormallığı və qeyri-inkişaf həddi nəzərə çarpır
Analitik yazıda o da vurğulanır ki, Ermənistanda ümumiyyətlə, siyasi mühitə təsir edə biləcək qüvvələr, güclər yoxdur. Səbəb hakim rejimin monopoliyasıdır. SİTAT: "Bütün bunların kökündə dayanan səbəb isə budur ki, Ermənistanın siyasi mühitində ölkənin siyasi vəziyyətini düzəltmək qabiliyyətində olan qüvvələr praktiki olaraq yoxdur. Əbəs yerə deyil ki, siyasi güclər Ermənistandakı ağır siyasi vəziyyəti, eyni zamanda hakimiyyətin monopoliyalaşmış mövqeyi barədə etirazlarını bildirərkən ötən ilin iyul hadisələrinə, ya da fövqəladə hadisələr fonunda baş vermiş digər bənzər halların inkişafına işarə edirlər".
Sonda isə belə nəticəyə gəlinir ki, Serj Sarkisyan məhz bu cür rejimi vasitəsilə öz "gücünü" qoruyub-saxlamağa nail olub. Lakin nəticədə Ermənistanda anormallıq siyasəti daha da böyüyərək, partlamaq həddinə çatıb: "Beləliklə, məhz bu kimi məsələlərin kökü üzərində Ermənistanın siyasi həyatının anormallığı və qeyri-inkişaf həddi nəzərə çarpır. Görünür, Serj Sarkisyanın hakimiyyətinin "gücü" də bundadır..."
Rövşən NURƏDDİNOĞLU
Bütün xəbərlər Facebook səhifəmizdə
USD
EUR
GBP
RUB