"Dövlət qulluğuna qəbulda yeni Azərbaycan modeli yaradılıb". SİA-nın məlumatına görə, bunu bu gün jurnalistlərə açıqlamasında Prezident yanında Dövlət Qulluğu Məsələləri üzrə Komissiyasının sədri Bəhram Xəlilov deyib.
Onun sözlərinə görə, Prezident yanında Dövlət Qulluğu Məsələləri üzrə Komissiyasının dövlət qulluğu ilə bağlı keçirdiyi müsabiqələr tam şəffaf və obyektiv keçirilir: "Əvvəllər bir çox problemlər var idi, lakin onları da tədricən aradan qaldırmışıq. Dövlət qulluğuna qəbulda yeni Azərbaycan modeli yaradılıb. Yeni modeldə bir çox ölkələrin təcrübəsini öyrənmişik. Azərbaycana uyğun olan bir sıra yenilikləri bura daxil etmişik. Dövlət qulluğuna qəbulda vətəndaşların bilikləri, şəxsi keyfiyyətləri, xüsusi bacarıqlarını nəzər almaqla obyektiv və tam şəffaf qəbul prosesi həyata keçirilir. Burada heç bir meyar nəzərə alınmır. Müsahibə komissiyalarına isə müstəqil ekspertlər daxil etmişik".
Qurum rəsmisi bildirib ki, ekspertlərin tərkibində xüsusilə korrupsiyaya qarşı mübarizədə ixtisaslaşmış qeyri-hökumət təşkilatlarının nümayəndələri var: "Onlar da şəxsən vətəndaşların vakant dövlət qulluğu vəzifəsinə uyğun olub-olmaması məsələsinə qərar verirlər. Biz müsahibələrin video çəkilişini də aparırıq. Bütün çəkilişlər isə arxivimizdə saxlanılır. Müsahibəni insanlar apardığından subyektiv məqamlar var. Həmin çəkilişlər sonradan bizə imkan verir ki, bu məsələdə obyektivliyi tam təmin edə bilək. Problem yarananda isə biz həmin çəkilişlərin əsasında araşdırmalar aparırıq. Müsabiqələri çalışırıq ki, tam elektronlaşdıraq. 5 ilə yaxındır ki, test imtahanları kompüter vasitəsi ilə aparılır. Rəsmi internet səhifəmizdə bütün müsabiqə ilə bağlı, o cümlədən test bazasının, sualların mənbələri, müsahibə üçün proqramlar yerləşdirilib"
B.Xəlilov müsahibə mərhələsində komissiya üzvlərinin namizədlərə qərəzli münasibət göstərməsi ilə bağlı deyilən fikirlərə də aydınlıq gətirib: "Bizdə Apellyasiya Komissiyası fəaliyyət göstərir. Vətəndaş ora müraciət edə bilər. Əfsus ki, heç kim müraciət etmir. Çünki bilirlər ki, onların şikayətləri əsassızdır. Apellyasiya Komissiyası bu məsələləri çox ciddi şəkildə araşdırır. Video çəkilişin stenoqramı təşkil olunur və ekspertlər dəvət edilir. Hansı sualların düzgün və ya səhv cavablandırılması qiymətləndirilir".
Bütün xəbərlər Facebook səhifəmizdə
USD
EUR
GBP
RUB