Azərbaycanlı səfir Kubanın “Opciones” qəzetinə müsahibə verib

Kubanın “Opciones” həftəlik qəzetində jurnalist Hedelberto Lopez Blankın Azərbaycanın Kubadakı səfiri Ruslan Rzayev ilə “Azərbaycan inamla və uğurla inkişaf edir” başlıqlı müsahibəsi dərc edilib.

SİA-nın AZƏRTAC-dan əldə etdiyi məlumata görə, müsahibədə R.Rzayev Azərbaycanın son illərdəki iqtisadi inkişafı, 2023-cü il üzrə iqtisadi göstəricilər, ötən il Azərbaycanın ümum daxili məhsulunun 5 faiz, qeyri-neft sektoru üzrə isə 12 faiz artması, ümum daxili məhsulun 72 milyard ABŞ dolları təşkil etməsi və ölkəmizin xarici borcunun 6,4 milyard dollara düşərək, ümum daxili məhsulun 9 faizdən aşağı olması barədə məlumat verib. Habelə, Azərbaycanın əsas xarici ticarət tərəfdaşları və idxal-ixrac məntəqələri, eləcə də Qarabağ və Şərqi Zəngəzur iqtisadi rayonlarında quruculuq işlərinin aparılması barədə danışıb.

Müsahibə zamanı səfir, həmçinin Azərbaycan-Kuba ikitərəfli əlaqələrinə toxunaraq, ölkələrimiz arasında son müddətdə münasibətlərin inkişaf etdiyini, yüksək səviyyəli qarşılıqlı səfərlərin təşkil olunduğunu, Azərbaycanın COP29-a sədrliyini diqqətə alaraq iqlim dəyişikliyi məsələləri daxil olmaqla, iqtisadi-ticarət, səhiyyə, turizm, elm-təhsil, mədəniyyət və idman sahələrində, o cümlədən parlament səviyyəsində əməkdaşlıq üçün geniş imkanların olduğunu vurğulayıb.

Bütün xəbərlər Facebook səhifəmizdə