Azərbaycan Xalça Muzeyində xalçaçı-rəssam, Azərbaycan Dövlət Rəssamlıq Akademiyasının dosenti Məmmədhüseyn Hüseynovun müəllifi olduğu “Pazırık xalısı. Rəmzlər dünyası” adlı kitabın təqdimatı keçirilib. SİA-nın məlumatına görə, tədbirdə Azərbaycan Respublikasının Mədəniyyət və Turizm naziri Əbülfəs Qarayev, o cümlədən nazirliyin, Azərbaycan Milli Elmlər Akademiyasının, Azərbaycan Dövlət Rəssamlıq Akademiyası və Azərbaycan Rəssamlar İttifaqının nümayəndələri iştirak ediblər.
Tədbirdə çıxış edən muzeyin direktoru, ICOM Azərbaycan Milli Komitəsinin sədri, sənətşünaslıq üzrə fəlsəfə doktoru Şirin Məlikova bildirib ki, bu kitab nəinki təkcə Azərbaycan xalçaçılıq elmi üçün böyük töhfədir, eyni zamanda, bütövlükdə türk dünyasının simvolu, mənəvi və maddi mədəniyyətimizin abidəsi olan xalça sənətinin öyrənilməsi üçün qiymətli və dərin mənbədir. “Dünyada Pazırık xalça kimi tanınan bu xalça bütün türk dünyası üçün sakraldır. Onun səthində yerləşən ornamentlərin çox əhatəli mənaları, xalçanın mükəmməl və dəqiq kompozisiya quruluşu, əsrlər boyü rənglərin şux qalması bu sənətin qədim dövrlərdə yüksək inkişaf səviyyəsini bildirir ” – deyə Şirin Məlikova vurğulayıb.
Müəllifin bu kitab üzərində illər ərzində çalışdığını bildirən Şirin Məlikova onun çoxlu faktlar, maraqlı ideyalar irəli sürdüyünü qeyd edib: “Təsəvvür etmək çətin olur ki, bu xalının yaşı 2500 ilə bərabərdir və 1949-cu ildən aşkar olunmasından sonra tətqiq olunur. Müəllif bu tədqiqatda müxtəlif yanaşmaları nəzərə alaraq, bu xalının məhz türk xalqlarına məxsusluğunu sübut edir. Mədəniyyət və Turizm Nazirliyinə bu kitabın gözəl dizaynı və çapını öz üzərinə götürdüyünə görə minnətdarlığımı bildirirəm. Bu kitabın daha geniş auditoriyaya çatdırılması, beynəlxalq səviyyədə təqdim olunması üçün ingilis dilində olması vacibdir. Bu, milli-mədəni dəyərlərimizə, maddi irsimizə sahiblənmək istəyən məkrli qonşumuza həm coğrafi-mədəni, həm də mənəvi hüdudları aşan yaxşı cavabdır. Sözügedən kitabda muzeyin bir neçə eksponatı da təqdim olunub".
Azərbaycan Respublikası Mədəniyyət və Turizm naziri Əbülfəs Qarayev kitabın əhəmiyyətindən söz açaraq, belə elmi əsərlərin beynəlxalq aləmdə təbliğ olunmasının vacibliyini qeyd edib. O, bildirib ki, Azərbaycan Respublikasının Prezidenti İlham Əliyev tərəfindən dövlətimizin apardığı məqsədyönlü siyasət nəticəsində xalçaçılıq sənəti inkişaf etdirilir: “Azərbaycanın Birinci vitse-prezidenti Mehriban Əliyevanın səyləri nəticəsində 2010-cu ildə Azərbaycanın xalça sənəti YUNESKO-nun Bəşəriyyətin Qeyri-maddi mədəni irs üzrə Reprezentativ siyahısına daxil edilməsi, 2014-cü ildə Azərbaycan Xalça Muzeyinin yeni binasının açılması, bu günlərdə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nın təsdiq edilməsi haqqında Azərbaycan Respublikası Prezidentinin Sərəncamı bu sahəyə dövlətimizin xüsusi diqqət ayırdığını nümayiş etdirir”.
Tarix elmləri doktoru, professor, AMEA-nın həqiqi üzvü Teymur Bünyadov, Azərbaycan Respublikasının xalq rəssamı, AMEA-nın həqiqi üzvü, Azərbaycan Dövlət Rəssamlıq Akademiyasının rektoru Ömər Eldarov, Milli Məclisin deputatı, AMEA-nın həqiqi üzvü Nizami Cəfərov, Azərbaycan Rəssamlar İttifaqının katibi, xalq rəssamı Ağəli İbrahimov çıxış edərək, kitabın Azərbaycan xalçaçılıq sənətinin tarixi üçün layiqli bir elmi əsər olduğunu nəzərə çatdırıblar. Pazırık xalçasının tədqiqatına həsr olunmuş uğurlu elmi əsər kimi bu kitabın ərsəyə gəlməsi münasibətilə müəllifi təbrik ediblər.
Xalçaçı-rəssam, Azərbaycan Dövlət Rəssamlıq Akademiyasının dosenti, “Pazırık xalısı. Rəmzlər dünyası” adlı kitabın müəllifi Məmmədhüseyn Hüseynov Xalça Muzeyinin rəhbərliyinə tədbirin təşkilatçılığına görə təşəkkür edərək, tədbir iştirakçılarına öz minnətdarlığını bildirib.
Bütün xəbərlər Facebook səhifəmizdə
USD
EUR
GBP
RUB