"İlham Əliyevin 2003-cü il oktyabrın 15-də Azərbaycanın Prezidenti seçilməsi ölkənin siyasi, iqtisadi və sosial inkişafında yeni mərhələnin başlanğıcı oldu". Bu fikirləri SİA-ya açıqlamasında siyasi şərhçi Elmir Səftərov deyib.
Onun sözlərinə görə, onun prezidentliyi dövründə Heydər Əliyev tərəfindən müəyyənləşdirilmiş dövlətçilik strategiyasının davam etdirilməsi, siyasi sabitliyin qorunması, dövlət institutlarının möhkəmləndirilməsi və ölkənin beynəlxalq mövqelərinin gücləndirilməsi əsas istiqamətlər kimi ön plana çıxdı:
"Bu dövrün təhlili göstərir ki, Azərbaycanın inkişaf siyasəti daxili sabitliyin təmin edilməsi, iqtisadi potensialın artırılması, xarici siyasət imkanlarının genişləndirilməsi və milli təhlükəsizlik maraqlarının qorunması kimi bir-biri ilə əlaqəli məqsədlər üzərində qurulmuşdu.
İqtisadi siyasətin əsas istiqamətlərindən biri enerji resurslarından səmərəli istifadə və ölkənin beynəlxalq enerji bazarlarında mövqeyinin möhkəmləndirilməsi idi. Neft-qaz layihələrinin həyata keçirilməsi və ixrac infrastrukturunun inkişafı Azərbaycanın iqtisadi imkanlarını genişləndirdi, enerji sahəsinin xarici iqtisadi əlaqələrdə rolunu artırdı. Bununla yanaşı, iqtisadiyyatın şaxələndirilməsi, qeyri-neft sektorunun inkişafı və nəqliyyat-logistika imkanlarının genişləndirilməsi istiqamətində tədbirlər görüldü. Şərq-Qərb və Şimal-Cənub nəqliyyat dəhlizlərinin inkişafı Azərbaycanın tranzit ölkə kimi əhəmiyyətini artırmaqla yanaşı, onun regional iqtisadi əlaqələr sistemində mövqeyinin güclənməsinə şərait yaratdı.
Xarici siyasət sahəsində Azərbaycanın milli maraqlarının qorunması, müxtəlif dövlətlərlə münasibətlərin inkişaf etdirilməsi və beynəlxalq təşkilatlarla əməkdaşlığın genişləndirilməsi əsas məqsədlərdən biri oldu. Enerji və nəqliyyat layihələri ölkənin beynəlxalq tərəfdaşlıq imkanlarını artıraraq iqtisadi amillərlə diplomatik fəaliyyət arasında qarşılıqlı əlaqəni gücləndirdi. Eyni zamanda, Ermənistan-Azərbaycan münaqişəsinin həlli və ərazi bütövlüyünün bərpası xarici siyasətin başlıca prioritetlərindən biri olaraq qaldı. Azərbaycan beynəlxalq hüququn prinsiplərinə və BMT Təhlükəsizlik Şurasının münaqişə ilə bağlı qətnamələrinə istinad edərək diplomatik səylərini davam etdirdi. Lakin danışıqlar prosesinin uzun müddət nəticəsiz qalması münaqişənin həllində hərbi-siyasi amilin əhəmiyyətini artırdı.
Bu kontekstdə müdafiə qabiliyyətinin gücləndirilməsi və ordunun modernləşdirilməsi dövlət siyasətinin mühüm istiqamətinə çevrildi. Hərbi potensialın artırılması, müdafiə infrastrukturunun inkişafı və diplomatik fəaliyyətin davam etdirilməsi Azərbaycanın ərazi bütövlüyünün bərpasına yönəlmiş siyasətinin əsas elementlərini təşkil etdi. 2020-ci ildə baş vermiş 44 günlük Vətən müharibəsi bu siyasətin nəticələrindən biri kimi ölkənin hərbi-siyasi tarixində dönüş nöqtəsi oldu. Müharibə nəticəsində Azərbaycan ərazilərinin böyük hissəsi üzərində nəzarətini bərpa etdi. 2023-cü ilin sentyabrında Qarabağda keçirilən antiterror tədbirlərindən sonra isə Azərbaycanın bütün ərazisi üzərində suverenliyi bərpa olundu. Bu hadisələr ölkənin ərazi bütövlüyü məsələsinin həllində yeni mərhələ yaratmaqla yanaşı, Cənubi Qafqazda mövcud siyasi və təhlükəsizlik mühitinin dəyişməsinə səbəb oldu.
Ərazi bütövlüyünün və suverenliyin bərpası Azərbaycanın dövlətçilik tarixində mühüm siyasi nəticə olmaqla yanaşı, qarşıdakı dövr üçün yeni vəzifələr də müəyyənləşdirdi. Qarabağ və Şərqi Zəngəzur iqtisadi rayonlarında bərpa və yenidənqurma işlərinin aparılması, əhalinin doğma torpaqlarına qayıdışının təmin edilməsi, infrastrukturun qurulması və regionun iqtisadi dövriyyəyə inteqrasiyası müharibədən sonrakı inkişaf gündəliyinin əsas məsələlərinə çevrildi. Eyni zamanda, regionda davamlı sülhün təmin olunması, qalib ölkə kimi Ermənistanla münasibətlərin normallaşdırılması və nəqliyyat-kommunikasiya əlaqələrinin inkişafı Azərbaycanın gələcək xarici siyasətinin mühüm istiqamətləri olaraq aktuallıq qazandı.
Bu dövrün siyasi və iqtisadi təhlili Azərbaycanın dövlətçilik inkişafında mühüm dəyişikliklərin baş verdiyini, eyni zamanda, yeni mərhələnin özünəməxsus imkanlar və çağırışlar yaratdığını göstərir".
Bütün xəbərlər Facebook səhifəmizdə
USD
EUR
GBP
RUB