“Kənd namusu” operası nümayiş olunub

Bakı Musiqi Akademiyasının Opera Studiyasında italyan bəstəkarı Pyetro Maskanyinin “Kənd namusu” (Cavalleria rusticana) məşhur birpərdəli operası nümayiş olunub.

SİA yerli mənbələrə istinadən xəbər verir ki, tamaşa ilk dəfə 2015-ci ildə alman rejissoru Lüdviq Bauman tərəfindən Bakıda tamaşaya qoyulub və o vaxtdan opera sənətini sevərlər arasında böyük rəğbət qazanıb.

Opera tarixinin ən böyük sensasiyalarından və səhnədə tələb olunan əsərlərdən olan “Kənd namusu” birpərdəli operası 1890-cı ildə Covanni Verqanın eyniadlı novellası əsasında Covanni Tarconi-Tozzetti və Gvido Menaşinin librettosuna yazılıb. Operanın premyerası həmin il “Teatro dell'Opera di Roma”da baş tutdu və italyan operasında “verizm” (italyan dilində “həqiqət” mənasını verən “vero” sözündən) adlı cərəyanın əsasını qoydu. Bu istiqamət əsrin sonlarında yox olsa da, onun ideyaları Cakomo Puççini, Françesko Çilea və başqa bəstəkarların operalarında, daha sonra isə İtaliya kinosunda öz əksini tapdı.

Dramatik hadisələr, qanlı dram və çevik italyan kantilena ilə dolu “Kənd namusu” bir daha səhnəni açıq və hərtərəfli ehtiras və möhtəşəm ifadə gücü ilə doldurdu.

Santuzza rolunu ifa edən Aytac Şixəlizadə şirnikləndirilmiş qızın sədaqətini və çılğın məhəbbətini ifadə edib, Əməkdar artist Azər Zadə isə ehtiraslı və valehedici gənc Turiddu obrazını canlandırıb. Beynəlxalq müsabiqə laureatı Taleh Yahyayev üçün məhəbbəti amansızlıq və qisasçılıq ilə əvəzlənən kənd taksi sürücüsü Alfionun rolu artıq tanışdır. Eləcə də rolunu hər zaman təsirli ifa edən, ana qəlbinin duyğularını məharətlə çatdıran Əməkdar artist Səbinə Vahabzadə üçün Lüçiya rolu. Nəhayət, Lola rolunda Nina Makarova da, demək olar ki, öz qəhrəmanının qeyri-ciddi və hərdəmxəyal xarakterində özünü çox rahat hiss edir.

Quruluş tamaşaçılar tərəfindən böyük maraqla qarşılanıb. Gərgin süjet xətti, dərin emosional çıxışlar və musiqili müşayiət operasevərlərə unudulmaz anlar bəxş edib.

Tamaşanın bədii rəhbəri və dirijoru Azərbaycan Respublikasının Xalq artisti Cavanşir Cəfərovdur. Quruluşçu rejissoru Azərbaycan Respublikasının Əməkdar incəsənət xadimi Hafiz Quliyev, quruluşçu rəssamı Əməkdar mədəniyyət işçisi Yusif Babayev, xormeysteri Azərbaycan Respublikasının Əməkdar incəsənət xadimi Sevil Hacıyevadır.