Azərbaycan yığmasının və "Qarabağ"ın zədədən əziyyət çəkən müdafiəçisi Bədavi Hüseynovun azerisport.az saytına müsahibəsi
- Klubdan verilən məlumata görə, artıq məşqlərə başlamısınız. Hazırda özünüzü necə hiss edirsiniz?
- Normal. Komanda ilə məşqləri bərpa etmişəm. Artıq fiziki cəhətdən bərpa olmağa çalışıram. Çünki uzun müddət idi oynamırdım.
- Belə çıxır ki, hələ oynamağa hazır deyilsiniz?
- Ümid edirəm ki, tezliklə oynamağa başlayacağam. Amma baş məşqçinin mənə nə vaxt, nə qədər şans verəcəyini bilmirəm.
- Sizi "Fiorentina" ilə oyunda meydanda görə biləcəyik?
- 100 faiz hazır olsam, yəqin ki, Qurban Qurbanov meydana buraxacaq.
- İtaliya klubu ilə oyundan öncə sizi bu gün "Kəpəz"lə görüş gözləyir. Bu oyundan nə gözləyirsiniz?
- Gəncədə oynamaq həmişə çətin olub. Amma biz meydana qələbə üçün çıxacağıq. Rəqibə hörmət edirik və qələbə qazanmaq istəyirik.
- Uzun müddət oynamadığınızı nəzərə alsaq, yəqin ki, futbol üçün çox darıxmısınız...
- Çox darıxmışam. İnanın ki, oyunları kənardan izləmək çox ağırdır.
- "Qarabağ" Avroliqanın qrup mərhələsi çərçivəsində Çexiya "Slovan"ına qarşı oyunda necə təsir bağışladı?
- Pis çıxış etmədik. Üstünlük komandamızda idi. Əfsuslar olsun ki, bu üstünlükdən yararlana bilmədik. Rəşad Sadıqov bir daha əsl kapitan olduğunu nümayiş etdirdi.
- Oynamaq çətindir, azarkeşlik etmək?
- Kənardan baxanda çox əsəbləşirsən. Çünki komandaya kömək edə bilmirsən. Ancaq qışqırmaq imkanın olur (gülür).
- Sizin mövqeyinizdə oynayan Elvin Yunuszadə çıxışına görə çox tənqid olundu...
- Mən onun zəif çıxış etdiyini düşünmürəm. Layiqli mübarizə apardı. Həm də unutmaq lazım deyil ki, o, uzun müddət oynamırdı, buna görə də ona vaxt lazımdır.
Bütün xəbərlər Facebook səhifəmizdə
USD
EUR
GBP
RUB