Məşqçilər üçün ümumrespublika seminarı keçirilib

21-23 dekabr 2013-ci il tarixində "Sərhədçi" İdman Olimpiya Mərkəzində sərbəst və yunan-Roma güləşi üzrə böyüklər arasında Azərbaycan çempionatı keçiriləcək. Siasport.az saytının məlumatına görə, çempionat öncəsi klub və cəmiyyətlərdə fəaliyyət göstərən yunan-Roma güləşi üzrə məşqçi müəllimlər üçün ümumrespublika seminarı keçirilib.

Azərbaycan Güləş Federasiyası (AGF) rəhbərliyinin göstərişi ilə yığma komandanın baş məşqçi müəllimi və AGF-nin Hakimlər Kollegiyası tərəfindən aparılan seminarda məqsəd Beynəlxalq Güləş Federasiyası tərəfindən güləş qaydalarında və çəki dərəcələrində edilən dəyişikliklər barədə yerli məşqçi və mütəxəssisləri məlumatlandırmaq, son keçirilən yarışlardan videogörüntülər izlədilərək qaydaları izah etmək, güləşçilərin hazırlığı üçün müasir məşq metodları barədə nəzəri və praktiki biliklər paylaşmaqdan ibarətdir.

Seminarda çıxış edən Azərbaycan Güləş Federasiyasının baş katibi Əjdər Cəfərov Beynəlxalq Güləş Federasiyası tərəfindən təsdiq edilən yeni çəki dərəcələri və güləş qaydalarına edilən dəyişikliklər barədə məlumat verib, məşqçi müəllimlərin hazırlıq prosesində bu dəyişiklikləri nəzərə almalarının vacibliyini bildirib.

Daha sonra AGF Hakimlər Kollegiyasının sədri, Olimpiya dərəcəli hakim Bəhmən Talebi qaydalardakı dəyişiklikləri geniş izah edib, məşqçi müəllimləri maraqlandıran sualları cavablandırıb. Mübahisəli məqamlar monitorda göstərilərək müzakirə edilib.

Sərbəst güləş üzrə məşqçi müəllimlər üçün seminar isə dekabrın 22-də saat 14.00-da baş tutacaq.

Bütün xəbərlər Facebook səhifəmizdə

loading...