Son illər yerli və Avropa arenada qazandığı möhtəşəm uğurları sayəsində nəinki Avropanın həm də bütün dünyanın diqqətini cəlb edən "Rabitə Bakı" voleybol komandası Beynəlxalq Voleybol Federasiyası (FİVB) tərəfindən daha bir xoş xəbərlə müjdələndirilib. Rabitə və İnformasiya Texnologiyaları Nazirliyinin mətbuat xidmətindən SİA-ya verilən məlumata görə, Avropa Çempionlar liqasında iştirakı təsdiqlənən komandamızın bu dəfə səsi daha böyük turnirdən gələcək.
Belə ki, FİVB-dən gələn xüsusi dəvətə əsasən son illərin dəyişməz çempionu möhtəşəm Dünya Çempionatında iştirak edərək Azərbaycan xalqını sevindirməyə çalışacaqdır. Son mövsüm Avropada final oynayan "Rabitə"nin bu haqqı heçdən qazandığını da söyləmək olmaz. Komandamız ötən mövsüm Avropa nəhənglərini gerisində buraxaraq Çempionlar liqasında final oynamaqla bu haqqa iddiasını göstərdi və klub rəhbərliyinin gələcəklə bağlı daha ciddi planlarına eyham vurdu.
Bütün bu zəhmətlərin bəhrəsini görmək isə klub rəhbərliyi ilə yanaşı bütün Azərbaycan xalqını sevindirməyə bilməz. Axı bu nəinki voleybol tariximizdə, hətta bütün Azərbaycan idmanı tarixində kollektiv idman növlərində hər hansı bir klubun ilk dəfə Dünya Çempionatında iştirakı deməkdir.
Beləliklə 8-14 Oktyabr 2011-ci il tarixlərində Qətərin paytaxtı Doha şəhərində təşkil olunacaq FİVB klublararası Dünya Çempionatında bir Azərbaycan komandası da iştirak edəcəkdir. Bu turnirdə iştirak edəcək 6 komandadan artıq 4-ü məlumdur. Belə ki öz qitələrinin çempionları Kenya Prisons (Afrika), Caguas (Norceca), Rabitə Bakı və VGSTT (Avropa) artıq bu turnirdə iştirak edəcəyini dəqiqləşdirərək daha iki rəqibin adının aydınlaşmasını gözləyir. Vakant yerlərin sahibləri isə Cənubi Amerika və Asiya Çempionlarının adları bəlli olandan sonra öz yerlərini tutacaqlar.
Dünya Çempionatının ilk mərhələsinin püşkatma mərasimi 26 iyun 2011 ci il tarixində Doha şəhərində keçiriləcəkdir.
Bütün xəbərlər Facebook səhifəmizdə
USD
EUR
GBP
RUB