Azərbaycan uzun illərdir ki, dünyanın strateji bölgələrində qeyri-sabitliyin, münaqişələrin və təhdidlərin aradan qaldırılmasında beynəlxalq tərəfdaşları ilə birgə çalışır və yerləşdiyi regionda güclü təhlükəsizlik sisteminin qurulması yükünü bölüşür. Bununla yanaşı, Azərbaycan beynəlxalq siyasi və iqtisadi təhlükəsizlik məsələlərində konstruktiv mövqedən çıxış etməklə, milli maraqlarının qorunması istiqamətində də qətiyyətli addım atır. Prezident İlham Əliyevin “Avropa siyasi birliyi” Zirvə Toplantısı çərçivəsində keçirilən görüşlərdə milli maraqlarımızın müdafiəsi istiqamətində sərgilədiyi qətiyyət bir daha bunu təsdiqləyir.
Oktyabrın 6-da Praqada “Avropa siyasi birliyi” Zirvə Toplantısı çərçivəsində “Avropa qitəsində sülh və təhlükəsizlik” mövzusunda keçirilən dəyirmi masa ölkəmiz üçün mühüm əhəmiyyətə malikdir. Dəyirmi masada Azərbaycan Respublikasının Prezidenti İlham Əliyev cənabları çıxış edərkən bildirib ki, İkinci Qarabağ müharibəsindən sonra regionda yeni vəziyyət yaranıb. Ermənistan tərəfindən 30 illik işğala, işğal dövründə törədilmiş dağıntılara, vəhşiliklərə baxmayaraq, Azərbaycan Ermənistanla sülh müqaviləsinin imzalanması təklifi ilə çıxış edib. Dövlətimizin başçısı deyib ki, bu sülh müqaviləsinin əsasını Azərbaycanın təklif etdiyi 5 prinsip təşkil etməlidir. Möhtərəm Prezidentimiz həmçinin vurğulayıb ki, Ermənistanla Azərbaycan arasında münasibətlərin normallaşdırılması prosesində Avropa İttifaqı Şurasının Prezidenti Şarl Mişelin iştirakı və təşəbbüsü ilə keçirilmiş görüşlərin olduqca böyük əhəmiyyətini olub. Dövlətimizin başçısı xatırladıb ki, bu ayın əvvəllərində iki ölkənin xarici işlər nazirləri bu xüsusda görüş keçiriblər. Sülh müqaviləsi üzrə danışıqlar uzun müddət davam etməməli, mümkün qısa zaman kəsiyində başa çatdırılmalıdır. Praqa görüşü göstərdi ki, dövlət başçısının beynəlxalq hüquqa və ədalətə əsaslanan balanslaşdırılmış xarici siyasəti Azərbaycanın dünya miqyasında nüfuzunu artıraraq, onu regional gündəmdə həlledici söz sahibi olan ölkəyə çevirib və rəsmi Bakı milli maraqlarına dair məsələlərdə prinsipial mövqeyini heç zaman dəyişməyəcək.
Praqa görüşünün yekun bəyanatında Azərbaycan və Ermənistan bir-birinin ərazi bütövlüyünü və suverenliyini tanıdı və əsas sənəd kimi BMT Nizamnaməsi götürüldü. Yəni bu, Qarabağın Azərbaycanın ayrılmaz hissəsi olduğunu rəsmən təsdiqləyir. Burada suverenlik prinsipindən bəhs olunur və bu da Ermənistanın Azərbaycanın Qarabağ üzərində suverenliyini tanımasından xəbər verir.
Praqadakı yekun bəyanata görə, Azərbaycanın təkid etdiyi kimi, yaxın vaxtlarda sərhədlərin delimitasiyası üzrə komissiyaların iclasının keçirilməsi razılaşdırıldı. Praqada, həmçinin erməni tərəfinin təkid etdiyi Avropa İttifaqının mülki missiyasının vəzifələrinə aydınlıq gətirildi. Cəsarətlə demək olar ki, burada Nikol Paşinyanın və bütünlükdə erməni diasporunun Parisdən və Brüsseldən hərbi-siyasi dəstək almaq ümidləri puç oldu. Praqada beynəlxalq missiyanın yalnız Ermənistan ərazisində yerləşdirilməsi məsələsində Azərbaycanla razılaşan Avropa İttifaqı bir daha göstərdi ki, rəsmi Bakının maraqları Ermənistanın istəklərindən daha vacibdir.
Eldar Əsədov
YAP Tərtər rayon təşkilatının sədri
Bütün xəbərlər Facebook səhifəmizdə
USD
EUR
GBP
RUB