Stanislav Tarasov: Qərbin dövrü bitdi, dünyanın işləri Moskva-Pekin-Dehlidə həll olunacaq - MÜSAHİBƏ

Nüfuzlu rusiyalı politoloq Stanislav Tarasov “Caliber” analitik mərkəzinə müsahibəsndə Ukraynada davam edən hərbi əməliyyatlar, Rusiya-Qərb qarşıdurması haqda maraqlı fikirlər səsləndirib. Müsahibəni oxucularımıza təqdim edirik.

- Deməli, Stanislav Nikolayeviç, Rusiya Avropa Şurasından çıxdı. Sizcə, bu addım Kremlin xarici siyasətinə necə təsir edəcək?

- Rusiyanın Avropa Şurasından çıxması Rusiyanın xarici siyasətinə heç bir şəkildə təsir etməyəcək. Özləri hələ bizə yalvaracaqlar.

- Rusiya ilə Avropanın baxışları, istəkləri üst-üstə düşməyəndə ​​məhz belə olur. Elə həmin gün Strasburq yekdilliklə Rusiyanın Avropa Şurasından çıxarılmasını tövsiyə edən qətnamə qəbul etdi...

- Qulaq asın, artıq Avropa yoxdur. Avropa bir tərəfdən amerikalılar tərəfindən dağıdılır, digər tərəfdən biz şərqdən gəlirik. Avropa bitir. Nə Avropa, nə danışırsınız?

- Sonra nə olacaq?

- Biz bütün Avropa qanunvericiliyini, Avropa standartını ləğv edirik, yeni təhlükəsizlik strukturu formalaşır. Əgər əvvəllər bütün bu məsələlər Avropadan gəlirdisə, indi onlara Moskvada, Pekində, Dehlidə baxılmalıdır. Dünyanın taleyinin həll olunacağı bu 3 dünya paytaxtında. Avropanın qatarı isə yola düşür, bu artıq gedən istiqamətdədir.

- Avropa Şurası bundan əvvəl Rusiya hakimiyyətinə ölüm hökmünün tamamilə qadağan edilməsi məsələsinə baxmağı və Avropa İnsan Hüquqları Konvensiyasının müvafiq protokollarını ratifikasiya etməyi təklif edib. Rusiyanın AŞ-dən çıxması ilə bu məsələyə yenidən baxıla bilərmi?

- Bu məsələnin hazırda bizim üçün aktuallığı yoxdur. İndi biz tamamilə fərqli, ən vacib problemləri həll edirik.

- Ukraynanın taleyini?

- Bəli. Geosiyasi məsələləri. Ukrayna Rusiyanın təsir zonasına qayıdır. Ölüm cəzası nədir? Müharibə gedir. İnsanlar ölür. Nasist cinayətkarları ilə Ukraynanı doldurdular.

- Yaxşı. Müharibədən danışaq. Sizcə nə vaxt bitəcək və kimin xeyrinə?

- Bu aydın deyil ki? Ukraynanın bütün böyük şəhərləri Rusiya qüvvələri ilə əhatə olunub. Müharibəni artıq Kreml qazanıb, indi ancaq taktiki manevrlər var.

- Müharibə hələ bitməyib...

- Bəli. Düşünürəm ki, müharibə daha 20 gün davam edəcək. Biz Ukraynanın infrastrukturunu məhv etmək istəmirik, bu, hələ də bizim xalqımızdır, əksər hallarda aldansa da. Ona görə də əməliyyatları maksimum ehtiyatla həyata keçiririk, deyə bilərik ki, zərgər dəqiqliyi ilə işləyirik. Və bu vaxt tələb edir. Orada başqa dövlət olacaq və o çətin ki, əvvəlki kimi Ukrayna adlansın. Böyük ehtimalla “Rusiya Demokratik Respublikası” olacaq.

- Yəni hər şey Rusiyanın planı ilə gedir?

- Bəli, hər şey plan üzrə gedir. Bizim hər hansı narahatlıq bildirməyə əsasımız yoxdur. Mühüm məsələlər o qədər də dərhal həll edilmir və vaxt tələb olunur.

- Buna baxmayaraq, Rusiya ilə Ukrayna arasında müharibə bütün dünya üçün sürpriz oldu.

- Sizin üçün gözlənilməz oldu, biz buna hazırlaşırdıq.

- Bəs nə vaxtdan?

- 2014-cü ildən. Qərb bizi təhrik etdi. İndi isə Qərblə münasibətlər pozulduqda, nəhayət ki, “Qərb bizə lazımdırmı” sualı ortadan qalxdı. Qərb bizə lazım deyil.

- Rusiya Qərbə lazımdırmı?

- İndi gəlin görək bizsiz necə idarə edəcəklər.

- Rusiya Çinə tərəf getmək üçün Qərblə əlaqəsini bitirir?

- Niyə Çinə? Biz özümüzü təmin edən ölkəyik. İndi biz amerikalıları, NATO-nu Çinsiz məğlub etdik. Çin burada bizə niyə lazımdır? Bu, bizim tərəfdaşımız və müttəfiqimizdir, başqa heç nə yoxdur. Çinlilər bu müharibədə iştirak etmirlər.

- Bu aydındır. Mən Rusiyanın Çinlə inteqrasiyasını nəzərdə tuturam.

- Rusiya nəhəng ölkədir və inteqrasiya Rusiyaya doğru gedəcək. Biz Çinə inteqrasiya etməyəcəyik. Bunun üçün bizim çoxlu ehtiyatlarımız, imkanlarımız var.

- Proqnozunuz çox optimistdir.

- Qələbə qazanmağı nə NATO-dan, nə də Qərbdən yox, Moskvadan öyrənmək lazımdır. Əgər özlərini yaxşı aparmasalar, Portuqaliyanı belə götürərik.

- Rusiya bütün dünya ilə müharibə dilində danışacaqmı?

- Moskva bərabərlik dilinə köklənib, lakin Qərb dövlətləri özlərini nalayiq aparsalar, Rusiyadan ağızlarının payını alacaqlarını başa düşməlidirlər. Bəsdir artıq. Yetər. Əgər bizi saymasalar, biz də belə edəcəyik. Biz nə Varşavanı, nə Praqanı, nə də Budapeşti xilas etməyəcəyik. Siz ruslarla belə davrana bilməzsiniz. Ukraynanı aldatdılar, ora millətçilik səpdilər. Rus millətçiliyi, məsələn, tamam başqadır, beynəlmiləldir. İndi Ukraynada müxtəlif xalqların nümayəndələri öz vətənləri Rusiyanın mənafeyi üçün canlarını verirlər. Onları heç kim çağırmır, bizdə Ukraynadakı kimi hərbi xidmətə çağırış, məcburi çağırış yoxdur. Bu amerikalılarla müharibədir. Biz bu amerikalıları məğlub edəcəyik, lazım olsa onlardan kabab da hazırlayacağıq. Rus ayısını özləri oyadıblar. Amma başa düşürsən ki, ayını yuvadan çıxara bilərsən, amma onu geri qovmağın heç bir yolu yoxdur.

- Üçüncü dünya müharibəsinin baş verməsini dəstəkləyirsiniz?

- Hansı üçüncü dünya müharibəsi, artıq bu müharibə udulub.

- Yenə Rusiya qalib oldu?

- Bəli əminəm.

- Gözənilməz oldu. O zaman Rusiyanın gələcəyini proqnozlaşdırmaq olar?

- Rusiya böyük ölkədir və onun gələcəyi rus kapitalizmi ilə bağlıdır. Rusiya imperiyasının, Sovet İttifaqının mərhələləri olub, indi rus kapitalizmi dövrü başlayır.

- İndiki Rusiya kapitalist dövləti deyilmi?

- Bəli, kapitalist. Bu, xristian çalarlı kapitalizmdir.

- Rusiyanın Ukraynadakı müharibədə qalib gəldiyini iddia edirsiniz. Amma siz düşünmürsünüz ki, bu, Rusiya iqtisadiyyatını məhv edir?

- Daha nə deməliyik. Bütün bunları kim düşündü? Parisdə çörək və yağ çatmır, ərzaq böhranı yaşayan onlardır. Bizdə isə hər şey var, mağazalar məhsullarla doludur. Moskvada hər şey sakitdir, panika yoxdur. Burada hər şey yaxşıdır, biz burada yaşayırıq, siz yox. Belə söz-söhbətləri liberallar və beşinci kolon yayır. Hər gün alış-verişə gedirik, hər şey qaydasındadır.

- Bəs inflyasiya yoxdur?

- Əlbəttə, qiymətlər qismən qalxır, amma bu, fəlakətli deyil. Bizim heç bir kəsirimiz yoxdur. Fikir verin, bahalı fransız ətirləri, iki min dollarlıq amerikan qalstukları rəflərdən yoxa çıxdı, yaxşı oldu, yox oldu. Hətta tualet kağızı alan fərdi həyəcanvericilər var. Niyə bilmirem. Yaxşı, nə İtalyan pendiri var, nə də İsveçrə pendiri, amma Belarus bizi pendirlərlə doldurdu. Orta Asiya bizi pendirlə doldurdu. İndi mağazalarda hətta qara kürü də peyda olub, spirtli içkilərin qiyməti düşür. Əvvəllər erməni konyakının qiyməti 3 min rubl idi, bir gün əvvəl isə 200 rubl pul götürdülər. Əvvəl bütün bunları Qərbə verirdik, indi ixrac dayanıb, nəticədə ixrac məhsulları ölkə daxilində qalır, ona görə də hər şeyi satmaq üçün daha ucuz qiymətə satırlar. Amerikada qazın qiyməti qalxır, biz isə ucuzlaşdırırıq. Təkcə benzinin qiyməti 40 faiz ucuzlaşıb.

- Rusiyaya kommunizm gəlib ki. Bəs siz rus qazını hara nəql edəcəksiniz?

- Dünyada Rusiya qazına tələbat çox yüksəkdir. Bizdən qazı Çin və Hindistan istəyir.

- Tələb var, amma logistik imkanlar yoxdur.

- Bəli. Biz boru kəmərləri çəkməliyik. İqtisadiyyatda müəyyən çətinliklər təbii ki, olacaq. Çünki bütün bunlar logistikanı qurmaq üçün il yarım vaxt aparacaq. Lakin bu proses Rusiya əhalisinin rifahına Qərbdə olduğu qədər zərər verməyəcək. Artıq onlarda enerji və ərzaq böhranı yaranıb. Bir aydan sonra onların çətinlikləri başlayacaq və bizim isə böyük və zəngin ölkəmiz var, hər şey yaxşı olacaq.

- Bir sözlə, defolt Rusiya iqtisadiyyatını təhdid etmir?

- Qətiyyən.

- Bu, ümidvericidir, çünki Rusiya iqtisadiyyatının çətinlikləri onun tərəfdaşları üçün də qaçılmazdır...

- Tərəfdaşlarımız bütün prosesləri kifayət qədər sakit izləyirlər. Benzin qıtlığına görə boş qalan Parisdir, amma Rusiyada hər şey qaydasındadır.

- Sizcə, qlobal böhran nəticəsində yalnız rus oliqarxları böyük zərər çəkib?

- Bəli. Bu, sevindiyimiz faktdır. Saxtakarlar hər şeyi oğurladılar. Qoy rədd olsunlar.

- Müharibəyə qayıdaq. Ukrayna tərəfi ilə danışıqların nəticələri barədə nə düşünürsünüz?

- Ukrayna tərəfinin nümayəndələrinin səlahiyyəti yoxdur, bunlar, dələduzdurlar. Tezliklə Kiyev, Xarkov, Odessa nəzarətə götürüləcək. Onlar Qərbin kömək edəcəyi ümidi ilə zamanla oynayırlar. Və zaman da bizim üçün faydalıdır. Biz barbarcasına hərəkət edə bilmərik. Və niyə onun ərazisində yerləşən şəhərləri vurduq? Axı dağılan hər şeyi Qərb yox, biz bərpa etməli olacağıq. Bu gün qazırıq, sabah bərpa etməliyik. Ona görə də biz körpüləri, yolları qoruyuruq və bu manevr imkanlarını daraldır, başa düşürsən. Biz total müharibədə deyilik.

- Bəs siz onlarla mülki şəxsin, o cümlədən azyaşlı uşaqların həlak olmasını necə izah edirsiniz?

- Bu müharibədir. Təəssüf ki, təsadüfi qurbanlar var, bunu istisna etmək olmaz. Ancaq Rusiya tərəfindən mülki əhalinin məhv edilməsi üçün məqsədyönlü hərəkətlər etmək qadağandır. Bu, taktika və ya təbliğat məsələsi deyil. Bəli, qurbanlar var, bununla bağlı heç nə etmək olmaz.

- Son məlumatlara görə, artıq 3 milyondan çox insan Ukraynanı tərk edib...

- Bu yekun rəqəm deyil. 15 milyon insan olacaq. Çamadanlar əlində və irəli- Londona, Varşavaya, Praqaya. Səyahətiniz xeyirli olsun. Bu, bizim yox, Avropanın problemidir. Axı onlar 8 il Minsk razılaşmalarına əməl etmədilər, bizim fəaliyyətsiz olacağımızı gözləyirdilər. Burada onlar hesablanır. Bir rus ayısını oyatdılar, onu paylarını alacaqlar. Əgər onlar bizə müdaxilə etsələr, o zaman Helsinkiyə çatacağıq və Baltikyanı ölkələri alacağıq. Beləliklə, bütün ukraynalı qaçqınlar Avropaya göndərilməlidir. Başqa haraya ola bilər? Bəlkə Ermənistana qaçmalıdırlar?

- Yeri gəlmişkən, boş yerə ironiya edirsiniz. Ermənistana Ukraynadan yox, Rusiyadan 30 minə yaxın qaçqın gəlib. Maraqlıdır, niyə?

- Bu, dəyişiklikdən qorxan qərbpərəstlərin 5-ci kolonudur. Beləliklə, onlar Avropaya, İsrailə, Ermənistana, Gürcüstana qaçırlar. Qoyun qaçsınlar. Çoxlarının xarici hesabları, investisiyaları var. Onlar sonda Ermənistandan Qərbə keçə biləcəklər, Rusiyadan isə bu mümkün deyil. Ona görə də onlar buradan qaçırlar.

Müsahibə aldı – Mətanət Nəsibova

Tərcümə etdi - Elçin Bayramlı