"Çox maraqlıdır ki, yeni ABŞ prezidentinin inaqurasiyasına cəmi 10 gün qalsa da, demokratlar Trampın impiçmentinə ciddi cəhd göstərirlər. Mənasız cəhdlərdi, siyasi motivlidir və təbii ki, səbəbləri var". Bunu SİA-ya açıqlamasında "Bakı Xəbər" qəzetinin Baş redaktoru, siyasi şərhçi Aydın Quliyev deyib.
Ekspertin sözlərinə görə, əvvala, impiçmentin baş tutması üçün Senat da səs verməlidir: "Lakin respublikaçı çoxluq da daxil olmaqla Senat yanvarın 19-dək məzuniyyətdədir. Həm də məqsədli şəkildə. İkinci, impiçmentin nə əsasla edilə biləcəyi də perspektivsizdir. Deyə bilməyəcəklər ki, seçkinin nəticələri ilə razılaşmadığı üçün impiçment edilir. Üçüncü, konstitusiyaya əlavənin 25-ci maddəsi də çətin ki, işləsin. ABŞ tarixində cəmi bir dəfə - 1963-cü ildə Kennedi öldürüləndə bu maddə tətbiq edilərək hakimiyyət vitse-prezidentə verildi. İndiki halda Trampa qarşı 25-ci maddəyə uyğun olaraq hansı əsasla "prezidentlik qabiliyyətində deyil" ittihamının irəli sürüləcəyi də qeyri ciddi görsənir".
A.Quliyev vurğulayıb ki, demokratların onu sonadək əzmək cəhdlərinin səbəbinə gəldikdə isə bu qətiyyətlə belədir: "Cəmi 4 ildən sonrakı seçkidə Trampın yenidən böyük maneəyə çevrilə bilməsinin qarşısını indidən kəsmək istəyirlər. Boş yerə... Tramp böyük populyarlığa malikdir və cəmiyyət isə faktiki iki yerə bölünüb. Bu siyasi konfiqurasiya 2024-cü ilədək dəyişməyə bilər".
Bütün xəbərlər Facebook səhifəmizdə
USD
EUR
GBP
RUB