"Biz bundan sonra partiyamızın yubileylərini daha yüksək ab-havada, qalibiyyət əhval-ruhiyyəsində qeyd edəcəyik" Musa Quliyev

"Yeni Azərbaycan Partiyası (YAP) Ulu Öndər Heydər Əliyevin ideyaları əsasında fəaliyyət göstərən siyasi təşkilatdır. Partiyamız ötən 28 il ərzində şərəfli yol keçib. Ölkəmizin ictimai-siyasi həyatında aparıcı rol oynayan Yeni Azərbaycan Partiyası həyatımızın bütün sahələrində tərəqqiyə nail olmaq məqsədilə yüksək fəallıq nümayiş etdirir". SİA-nın verdiyi məlumata görə, bu fikirləri Milli Məclisin Əmək və sosial siyasət komitəsinin sədri, YAP Siyasi Şurasının üzvü Musa Quliyev deyib. M.Quliyev bildirib ki, müstəqilliyimizin ilk illərində bu partiyanın yaranması tarixi zərurətə çevrilmişdi. Onun sözlərinə görə, Azərbaycanın parçalanması təhlükəsi xalqımızın Ulu Öndər Heydər Əliyevin hakimiyyətə qayıdışı üçün çağırışlarını gücləndirirdi. Çünki bütün vətəndaşlar yalnız Heydər Əliyevi xilaskar kimi görürdü. 21 noyabr 1992-ci ildə yaranan partiyamız Ulu Öndər Heydər Əliyevə xalqın böyük inamı olduğu üçün qısa müddətdə təşkilatlandı və ölkəmizin ən nüfuzlu siyasi qüvvəsinə çevrildi. YAP Siyasi Şurasının üzvü qeyd edib ki, YAP-ın milli maraqlarımıza və ölkəmizin inkişafına xidmət edən fəaliyyəti cəmiyyət tərəfindən daim yüksək dəyərləndirilir. Partiyamızın öz fəaliyyətində söykəndiyi ideologiya onu daim uğurlara aparır. "Partiyamız öz prinsiplərində Heydər Əliyev ideyalarına əsaslanır. Məhz bu amil uğurlarımızı təmin edən başlıca şərtdir. Bu gün ölkədə YAP ilə rəqabət aparmaq gücündə olan siyasi təşkilat yoxdur. Prezident, parlament, bələdiyyə seçkilərində mütəşəkkillik göstərən xalqımız daim Ulu Öndərimizin ideyalarına sədaqətini nümayiş etdirir. Xüsusilə qeyd etmək istəyirəm ki, Prezident İlham Əliyevin rəhbərliyi ilə partiyamız bu gün çox böyük uğurlara imza atır. Məhz bunun nəticəsidir ki, partiyamız Cənubi Qafqaz regionunda ən güclü siyasi təşkilatdır. Əminik ki, partiyamız ölkəmizin avanqard, yenilikçi siyasi qüvvəsi olaraq bu mövqeyini qoruyacaq və daha da gücləndirəcək. Bu əminliyi şərtləndirən vacib amil partiyamızın Sədri, ölkə Prezidenti, Ali Baş Komandan İlham Əliyevin rəhbərliyi ilə şanlı ordumuz tərəfindən torpaqlarımızın işğaldan azad olunmasıdır. Biz bundan sonra partiyamızın yubileylərini daha yüksək ab-havada, qalibiyyət əhval-ruhiyyəsində qeyd edəcəyik", – deyə YAP Siyasi Şurasının üzvü vurğulayıb. yap.org.az
Müəllif: Ceyhun Rasimoğlu

Bütün xəbərlər Facebook səhifəmizdə

loading...