Eldəniz Səlimov: “Həm siyasi, həm də hərbi cəhətdən Ermənistan çox geridə qalmış dövlətdir” RƏY-ÖZƏL
Ermənistanın baş nazirinin həyat yoldaşı Anna Akopyan işğal altında olan Dağlıq Qarabağa gələrək, erməni qadınlarının iştirakı ilə hərbi təlimlərdə iştirak edib. Bu, bir növ erməni terrorunun erməni qadınları tərəfindən də açıq şəkildə həyata keçirildiyinin əyani sübutu sayıla bilər.
Millət vəkili Eldəniz Səlimov “Səs” qəzetinə açıqlamasında bildirdi ki, İtaliya mətbuatında Azərbaycanın işğal olunmuş ərazilərində Ermənistanın Baş naziri Nikol Paşinyanın həyat yoldaşı Anna Akopyanın qismində həyata keçirdiyi təxribatlarla bağlı “Akopyan erməni qadınları mülki azərbaycanlılara qarşı hücuma hazırlayır” başlıqlı məqalə dərc olunub: “Jurnalistin məlumatına görə, “Eurasianews” xəbər portalında dərc olunan məqalədə bildirilir ki, son iyul hadisələrindən sonra hazırda Azərbaycan və Ermənistan arasındakı dövlət sərhədində və hər iki ölkənin qoşunları arasında təmas xəttində xüsusi zorakılıq halları müşahidə olunmamasına baxmayaraq, Ermənistan-Azərbaycan, Dağlıq Qarabağ münaqişəsi ilə bağlı narahatedici məqamlar mövcuddur. “Son aylar mətbuatda öz əri ilə birlikdə iqtisadi-maliyyə maxinasiyaları ilə məşhur olan Ermənistanın Baş naziri Nikol Paşinyanın həyat yoldaşı Anna Akopyan 2018-ci ildə regionda sülhün müdafiəçisi kimi özünü təqdim edir və azərbaycanlı qadınları da “Sülh uğrunda qadınlar” kampaniyasına qoşulmağa dəvət edirdi. Lakin cəmi il yarımdan sonra həmin Anna Akopyanın özünün “sülhpərvər qadınları” ilə birlikdə otuz ildən artıqdır ki, Ermənistanın hərbi işğalı altında olan Azərbaycanın Dağlıq Qarabağ regionunda hərbi təlimlərdə iştirak etdiyi barədə xəbərlər yayılır. O, sülhə çağırışlarını unudaraq və təlim yerlərinin yaxınlığında mülki azərbaycanlıların yaşadıqları kəndlərin mövcudluğuna məhəl qoymayaraq, qadınları, həmçinin silahlardan istifadə etməklə Dağlıq Qarabağı müdafiə etməyə dəvət edir”.
Eldəniz Səlimov onu da bildirdi ki, təlim yerlərindən çəkilmiş şəkillər həm Paşinyanın inqilabi diktaturasının, həm də Ermənistanın hərbi təcavüzünün mahiyyətini sübut edir: “Əgər Ermənistanda qadınlar da müharibəyə hazırlaşırlarsa, bu ölkənin sülh istəməsinə necə inanmaq olar? İyul hadisələri, eləcə də Ermənistan qadınlarının belə hərəkətləri Ermənistanın Müdafiə nazirinin sözlərini bir daha təsdiq edir, hansı ki, o, iyul hadisələri və Ermənistanın Azərbaycana hücum etməsi səbəbindən Tovuz rayonunda zorakılığın artmasından əvvəl bildirmişdi ki, “Ermənistan yeni ərazilər uğrunda yeni müharibəyə hazırdır”, - deyə məqalədə qeyd olunub. Bütün bu hallar onu göstərir ki, işğalçı Ermənistan Dağlıq Qarabağ məsələsini sülh yolu ilə deyil müharibə yolu ilə qaytarılmasını istəyir. Təbii ki, hər iki halda Azərbaycan qalib olacaqdır. Hər kəs bilir ki həm siyasi həm də hərbi cəhətdən Ermənistan çox geridə qalmış dövlətdir. Anna Akobyanın keçdiyi hərbi təlim də onu göstərir ki, onların qadınları belə terrorizmin dəstəkçisi və bu siyasətlərinin davamçılarıdır. Nə qədər də özlərini sülh adı altında gizlətməyə çalışsalar da, həqiqətlər gün işığı kimi aydındır”.
Bütün xəbərlər Facebook səhifəmizdə
USD
EUR
GBP
RUB