"Ölkəmizi belə bir fəlakətin astanasına gətirənlərə lənət olsun. Şəhidlər ölməz, bizim borcumuz şəhidlərin xatirəsini yaşatmaqdır". SİA-nın məlumatına görə, bunu bu gün Türkiyə prezidenti Rəcəb Tayyib Ərdoğan Türkiyədə 15 iyul hərbi çevriliş cəhdinin ildönümü ilə bağlı hakim Ədalət və İnkişaf Partiyasının (AKP) qərargahında təşkil edilən "15 temmuz - Milli iradənin zəfəri" mövzusunda keçirilən paneldə çıxışı zamanı bildirib.
Şəhidlərin xatirəsinə İstanbulda və digər şəhərlərdə ucaldılan abidələrin açılışının olacağını söyləyən R.T.Ərdoğan 15 iyuldan 16 iyula keçən gecə baş verən dövlət çevrilişinə cəhddə şəhid olan insanların xatirəsinə İstanbulda ucaldılmış abidənin açılışına bütün xalqı dəvət edib: "15 iyul milli tariximizin simvollarından biri olub. Ancaq 1 il keçməsinə baxmayaraq, 15 iyulun əhəmiyyətini bilməyənlər var. Belələrinin başında müxalifət partiyasının sədri də var. Mövlana ağaca su verməyi ədalət, qanqala su verməyi zülm kimi qiymətləndirir. Hərbi çevriliş cəhdində iştirak edənləri müdafiə edən Kamal Kılınçdaroğlu qanqala su verir. Xəstə olduğunu, azadlığa buraxılmasını istədikləri Mardin bələdiyyəsinin keçmiş sədri Əhməd Türkün yürüşdə iştirak etdiyini gördük. Onlar Vətənə xəyanət edənlərin hamısını qucaqlaya bilər, amma biz bunu etmədik, etməyəcəyik. Biz hər bir terrorçunu məhv etməyə söz verdik. Ana müxalifətin başında duran şəxs 15 iyulda İstanbulda orada-burada gizlənməkdənsə xalqın önünə çıxsaydı, daha yaxşı olardı. Tanklar aeroportdan çəkiləndən sonra Bakırköy bələdiyyə sədrinin evinə qaçan CHP sədri deyildimi? Ərdoğan gəlsə, onu qarşılayardım, deyirdi. Xalq orada idi, niyə orada olmadın? Əgər lider daşın arxasında gizlənsə, xalq dağın arxasında gizlənər. Bunlar daşın arxasında gizlənənlərdir. Biz min kilometrlərlə yol çəkdik, bunların 3 həftəlik yürüşü qədər səs çıxarmadıq. Hamburqda G20 sammitində 25 günlük aksiyada nələr baş verdi? Bunlar Türkiyədə 3 həftə yürüş keçirdilər, hansı səviyyədə təhlükəsizlikləri təmin olundu? Türkiyədə hüquq və azadlıqların təminatçısı AKP iqtidarıdır".
Türkiyədə heç kəsin həyatına, yaşamına qarışılmadığını vurğulayan Türkiyə prezidenti həmişə hüquq və azadlıqların təmini uğrunda mübarizə apardıqlarını söyləyib: "Mən açıq danışıram. Küçədə mübarizədən danışan CHP sədri küçəyəçıxmaz duruma düşər. Biz CHP hakimiyyətinin azərbaycanlı qardaşlarımızı Boraltan körpüsündə ölümə təslim etdiyini unutmadıq. Menderesi edam kürsüsünə yolladıqlarını unutmadıq. AKP-ni qapatmaq üçün hansı yollara baş vurduqlarını da unutmadıq".
R.T.Ərdoğan qeyd edib ki, CHP-nin yürüşünü 15 iyulla müqayisə etməsi yersizdir: "15 iyul hərbi çevriliş cəhdinin dəf edilməsindən sonra milli birliklə bağlı mitinqə də CHP sədri son anda gəldi. Onlar 15 iyulu televiziya ekranları qarşısında izlədilər. 80 milyonluq xalqımızın mübarizəsini CHP sədri görə bilmir. İndi deyirlər ki, həbs olunanlar azad edilsin, fövqəladə vəziyyət rejimi ləğv olunsun. CHP sədrinin bu sözləri şəhidlərə, qazilərə, qazi parlamentimizə, hökumətimizə, məhkəmələrimizə hörmətsizlikdir. CHP sədrinin söylədiklərindən məmnun olanlar FETÖ-çülər, PKK terrorçularıdır. Məhkəmələrimiz hərbi çevrilişdə iştirak edənlərə və onlara dəstək verənlərə cəzalarını verənə qədər bu mübarizə davam edəcək. Fövqəladə vəziyyət rejimi terror təşkilatları ilə mübarizəyə ehtiyac qalmayana qədər davam edəcək. 2019-cu ildə keçirilən seçki ilə prezident üsul-idarəsinə keçəcəyik. Türkiyədə bir daha çevriliş həyata keçirə bilməyəcəklərinin narahatlığını keçirirlər. Çünki görürlər ki, bu millət tankların, təyyarələrin qarşısında durduğu üçün bu milləti asanlıqla aşa bilməyəcəklər. Biz "Tək millət, tək bayraq, tək Vətən, tək dövlət" deyirik. CHP sədri hələ də bunu başa düşmədi. Hans, Corc bizə deyir ki, həbs edilənlər azad olunsun. Biz onlara söz deyəndə, deyirlər ki, məhkəmələrimiz var. Bizim də məhkəmələrimiz var. Ölkəmizin üzərində oyun oynayanlar, onlara alət olanlar FETÖ-çülərin acı aqibətini paylaşmağa hazırdırlarmı? Biz bu torpaqları qanımızla suvarmışıq".
Bütün xəbərlər Facebook səhifəmizdə
USD
EUR
GBP
RUB