Meksikanın "Notimeks" rəsmi Xəbərlər Agentliyində Azərbaycanın bu ölkədəki səfirliyinin müvəqqəti işlər vəkili Məmməd Talıbovla müsahibəyə istinad edilərək "Azərbaycan, onilliklər ərzində sülh axtaran xalq" adlı məqalə dərc edilib. (http://www.notimex.gob.mx/ntxnotaLibre/319561). SİA-ya ölkəmizin Meksikadakı səfirliyindən verilən məlumata görə, məqalədə Ermənistanın təcavüzü nəticəsində Azərbaycanın sayı on minlərlə ölçülən insan itkisi verdiyi və ölkəmizə milyardlarla ABŞ dolları həcmində zərər vurulduğu qeyd olunub. Buna baxmayaraq multikultural cəmiyyətə malik olan Azərbaycanın sülhə nail olmaq istəyi vurğulanıb. Məqalədə Azərbaycanın Dağlıq Qarabağ və onun ətrafında yerləşən digər yeddi rayonun - Laçın, Kəlbəcər, Ağdam, Füzuli, Cəbrayıl, Qubadlı və Zəngilanın Ermənistan tərəfindən işğal edildiyi, burada yaşayan azərbaycanlıların öz doğma torpaqlarından qovulduğu oxucuların diqqətinə çatdırılır. Bütün bu itkilər qarşısında Azərbaycan xalqı və ölkə rəhbərliyinin qaçqın və məcburi köçkünlərin öz doğma yurdlarına qayıtmasına imkan verəcək sülhə nail olmağa çalışdığı deyilir.
Azərbaycan diplomatına istinad edilərək işğal olunmuş ərazilərdə Ermənistan tərəfinin sülh prosesinə xələl yetirmək məqsədini daşıyan daha bir təxribatı olan qondarma "referendum" təşkil etdiyi bildirilərək, həmin addımın rəsmi olaraq bir sıra ölkələr tərəfindən pisləndiyi deyilir. Məqalədə vurğulanıb ki, ATƏT Minsk qrupu həmsədr ölkələri münaqişədəki hazırkı status-kvonun qəbuledilməz və qeyri-davamlı olduğu barədə bəyanatlar verib. Həmin "referendum" zamanı "müşahidəçi" qismində iştirak etmək üçün Azərbaycan ərazilərinə qeyri-qanuni səfər etmiş Avropa Parlamenti deputatlarına qarşı həbs qərarı verildiyi qeyd edilərək ölkəmizin qanunlarını eyni qaydada pozmuş meksikalı professor Rodriqo Qomez Qarsianın da eyni qərarla üzləşə biləcəyi barədə xəbərdarlıq edilib.
"Azərbaycan xalqı sülhsevərdir, burada uzun illərdir ki, müxtəlif din və mədəniyyət təmsilçiləri sülh və əmin-amanlıq şəraitində yaşayır, sülhün regionda bərqərar olmasına yeganə maneə məhz Azərbaycan torpaqlarının işğal altında olmasıdır", deyə M.Talıbov qeyd edib. Yazıda, həmçinin Ermənistanın Azərbaycanın işğal olunmuş ərazilərini dərhal və qeyd-şərtsiz tərk etməsini tələb edən BMT Təhlükəsizlik Şurasının dörd qətnaməsinin mövcud olduğu bildirilib, Azərbaycanın bu ərazilərində yaradılmış qondarma rejimin heç bir ölkə, o cümlədən Meksika tərəfindən tanınmadığı xatırladılıb.
Bütün xəbərlər Facebook səhifəmizdə
USD
EUR
GBP
RUB