Azərbaycanın Macarıstandakı səfirliyi 18 oktyabr-Dövlət Müstəqilliyi Günü münasibətilə böyük bayram tədbiri keçirib. SİA-ya səfirlikdən verilən məlumata görə, təbirdə çıxış edən səfir Vilayət Quliyev Azərbaycan xalqının müstəqillik uğrunda mübarizələrlə dolu tarixi haqqında məlumat verib. Çar Rusiyasının süqutundan sonra Şərqdə ilk demokratik respublikanın Azərbaycanda qurulduğunu xatırladan diplomat, Sovet İttifaqının süqutu ərəfəsində də azərbaycanlıların demokratiya və milli müstəqillik uğrunda hərəkatın önündə getdiyini vurğulayıb. V. Quliyev Azərbaycan torpaqlarının böyük bir hissəsinin hələ də qonşu Ermənistanın işğalı altında qalmasına baxmayaraq müstəqillik illərində ölkəmizin sürətli inkişaf yolu keçdiyinə, dünya birliyinin nüfuzlu üzvlərindən birinə çevrildiyinə diqqəti çəkib.
Tədbir çərçivəsində 1848-ci il macar inqilabı dövründə parlament binası olmuş İtaliya Mədəniyyət İnstitutunda Azərbaycan, İtaliya və Macarıstan incəsənət ustalarının iştirakı ilə konsert təşkil olunub. Konsert proqramı özünün zənginliyi və rəngarəngliyi ilə seçilib. Əvvəlcə Ferens List adına Budapeşt Musiqi Akademiyasının məzunu Jalə Rəsulova (pianino) və Vyana Musiqi Akademiyasının magistri Fərid Feyzullayev (skripka), görkəmli Azərbaycan bəstəkarları Qara Qarayev və Arif Məlikovun əsərlərindən parçalar ifa ediblər.
İtaliya, Macarıstan və Azərbaycan musiqiçilərindən ibarət FİBUBA (Florensiya, Budapeşt, Bakı) ansamblı üç ölkənin musiqi sənəti incilərindən tərtib olunmuş maraqlı konsert proqramı ilə çıxış edib. Tanınmış azərbaycanlı pianoçu Səidə Tağızadə, macar skripkaçısı Zoltan Banfalvi, italyan violençel ustası Pierluigi Ruggiera, Florensiya operasının solistləri Leonardo de Lisi (bariton) və Cüzeppe Suraçinin (tenor) ifasında Paolo Tosti, Nazim Əliverdibəyov, Bela Bartok, Sevda İbrahimova, Ferens List və Üzeyir Hacıbəylinin əsərləri yüksək ustalıqla ifa olunub. Leonorda de Lisinin Azərbaycan dilində oxuduğu məşhur "Sevgili canan" romansı xüsusilə böyük maraq və rəğbətlə qarşılanıb.
Böyük uğurla keçən bayram konsertində Budapeştdə akkreditə olunmuş diplomatik nümayəndəliklərin təmsilçiləri, macar elm və mədəniyyət xadimləri, Azərbaycan diasporunun üzvləri iştirak ediblər.
Bütün xəbərlər Facebook səhifəmizdə
USD
EUR
GBP
RUB