Parisdə İqtisadi Əməkdaşlıq və İnkişaf Təşkilatının (OECD) Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planının 13-cü monitorinq görüşü keçirilib. OECD üzv ölkələrinin, o cümlədən, Şərqi Avropa və Mərkəzi Asiya ölkələrinin, BMT, ATƏT, Avropa Şurası, Dünya Bankı və digər beynəlxalq təşkilatların təmsil olunduğu tədbirdə Azərbaycan Respublikasını Baş prokuror yanında Korrupsiyaya qarşı Mübarizə Baş İdarəsinin Təşkilati və informasiya təminatı şöbəsinin rəisi Rövşən Əliyev və həmin şöbənin prokuroru Sahib İsmayılovdan ibarət nümayəndə heyəti təmsil edib.
Baş Prokurorluğun mətbuat xidmətindən SİA-ya verilən xəbərə görə, monitorinq görüşündə Azərbaycan, Gürcüstan, Ukrayna, Qazaxıstan, Özbəkistan, Qırğızıstan və digər ölkələrin dövri hesabatları dinlənilib.
Azərbaycanla bağlı hesabatın dinlənilməsi zamanı R. Əliyev çıxış edərək dövlət başçısının siyasi iradəsinə uyğun olaraq ölkəmizdə həyata keçirilən korrupsiyaya qarşı mübarizə tədbirləri, o cümlədən "Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı"nın icrası və bununla əlaqədar hazırlanan qanun layihələri, korrupsiya hüquqpozmalarının aşkar edilməsi, təqsirləndirilən şəxslərin müəyyən edilərək cinayət məsuliyyətinə cəlb edilməsi istiqamətində əldə edilmiş nailiyyətlər, Vətəndaşlara Xidmət və Sosial İnnovasiyalar üzrə Dövlət Agentliyinin və onun tabeliyindəki "ASAN xidmət" mərkəzlərinin fəaliyyəti barədə ətraflı məlumat verib.
Antikorrupsiya Şəbəkəsinin 3-cü raund dəyərləndirilməsindən müvəffəqiyyətlə keçən ilk ölkə kimi Azərbaycan Respublikasına ötən ilin sentyabr ayında verilmiş tövsiyələr üzrə qısa müddət ərzində görülən işlər və əldə edilmiş nailiyyətlər qurum tərəfindən qənaətbəxş hesab edilib, son 6 ay ərzində tövsiyələrin icrası istiqamətində atılmış addımlar təqdirəlayiq hal kimi yüksək qiymətləndirilib.
Tədbirdə həmçinin, Tacikistan Respublikasının üçüncü raund dəyərləndirilməsinə dair hesabatı üzrə müzakirələr aparılıb, monitorinq qrupunun tərkibində ekspert qismində iştirak edən R. Əliyev tərəfindən hesabata dair rəy və təkliflər verilib, müzakirə olunan məsələlərə dair münasibət bildirilib.
Tədbirin sonunda şəbəkənin 2014-cü il üçün iş planının icra vəziyyəti müzakirə edilib və iştirakçı tərəflərin gələcək fəaliyyəti müəyyən edilməklə qarşıda duran vəzifələrlə bağlı qərar qəbul edilib.
Bütün xəbərlər Facebook səhifəmizdə
USD
EUR
GBP
RUB