Elmar Məmmədyarov: Azərbaycan hər zaman İslam ölkələri ilə siyasi, iqtisadi, mədəni və digər sahələrdə əlaqələrin inkişafına böyük önəm verib
Azərbaycanın xarici işlər naziri Elmar Məmmədyarov İslam Əməkdaşlıq Təşkilatı (İƏT) Xarici İşlər Nazirləri Şurasının Qvineyanın paytaxtı Konakri şəhərində "Sivilizasiyalararası dialoq: sülh və davamlı inkişaf amili" mövzusunda keçirilən 40-cı sessiyasında çıxış edib.
Nazir bildirib ki, İslam Ümməti ilə mədəni, dini və tarixi köklərlə bağlı olan Azərbaycan hər zaman İslam ölkələri ilə siyasi, iqtisadi, mədəni və digər sahələrdə əlaqələrin inkişafına böyük önəm verib.
E.Məmmədyarov vurğulayıb ki, coğrafi mövqeyinə görə Azərbaycan əsrlər boyu Qərb və Şərq sivilizasiyaları arasında körpü rolunu oynayıb. Azərbaycan hər zaman dünyada İslamın mədəni və mənəvi dəyərlərini təşviq edib. Sivilizasiyalararası dialoqun təşviqi məqsədi ilə təşkil edilən Ümumdünya Mədəniyyətlərarası Dialoq Forumu, Bakı Beynəlxalq Humanitar Forumu, həmçinin UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyası sözügedən missiyanın bariz nümunələridir.
Nazir deyib ki, Azərbaycan beynəlxalq ictimaiyyəti hər zaman dini nifrətə rəvac verilməsinə və dinlərin təhqir olunmasına qarşı qəti mübarizəyə çağırıb. Bu gün mövcud islamofobiya meyllərinin qarşısını almaq üçün İƏT çərçivəsində səylərin birləşdirilməsi çox vacibdir.
Azərbaycan xarici siyasət idarəsinin rəhbəri diqqətə çatdırıb ki, İslam dünyasının qarşılaşdığı davamlı problemlər İƏT çərçivəsində geniş və səmərəli əməkdaşlığı vacib edib.
Nazir bildirib ki, rəsmi Bakı Azərbaycan ərazilərinin 20 faizinin işğal edilməsi və həmin ərazilərdə dəhşətli etnik təmizləmənin törədilməsini qınayaraq göstərdiyi davamlı mövqeyə görə İslam Ümmətinə, hər bir İƏT üzvünə və İƏT Katibliyinə minnətdarlığını bildirir: "Biz xüsusilə BMT Təhlükəsizlik Şurasının, İƏT-in və digər beynəlxalq təşkilatların müvafiq qətnamələrində və qərarlarında erməni silahlı qüvvələrinin işğal altında olan ərazilərimizdən dərhal, qeydi-şərtsiz və tam şəkildə çıxarılması tələbinə görə İƏT-in üzv dövlətlərinə təşəkkür edirik".
Nazir bildirib ki, İƏT-ə üzv dövlətlər ilə siyasi, iqtisadi, mədəni və digər sahələrdə əməkdaşlığın gücləndirilməsi Azərbaycanın xarici siyasətinin prioritetlərindən biridir. İƏT-in məqsədlərini və İslam dəyərlərini təşviq edərək Azərbaycan qurumun fəaliyyətində və təşkilat tərəfindən həyata keçirilən proqramlarda yaxından iştirak edir.
E.Məmmədyarov diqqətə çatdırıb ki, Azərbaycan 2014-cü ildə "İƏT-ə üzv dövlətlərin inkişafında qadınların rolu" mövzusunda nazirlər konfransının 5-ci sessiyasına ev sahibliyi edəcək.
Bildirilib ki, rəsmi Bakı, həmçinin ehtiyacı olan İƏT üzvlərinə humanitar yardım göstərməyə davam edir. Azərbaycan Beynəlxalq İnkişafa Yardım Agentliyi İslam İnkişaf Bankı ilə birlikdə İƏT-in Afrikadan olan 9 üzv dövlətinə "Qarşısı alına bilinən korluqla mübarizə" kampaniyası çərçivəsində humanitar yardım təşkil edir.
E.Məmmədyarov bildirib ki, Azərbaycan İƏT və BMT arasında son illərdə əlaqələrin müxtəlif sahələrdə sıx məsləhətləşmələr və əməkdaşlıq şəklini alaraq daha da əhəmiyyətli olmasından məmnundur. Bir çox siyasi münaqişələrin İƏT regionunda baş verməsi səbəbindən qurum sülh və təhlükəsizliyin təmin edilməsi məsələlərində daha da fəal olmalıdır. Buna görə də biz İƏT və BMT Təhlükəsizlik Şurası arasında əməkdaşlığı və daha sıx birgə fəaliyyəti strateji hesab edirik.
Azərbaycanın BMT Təhlükəsizlik Şurasına sədrliyi dövründə BMT və İƏT arasında əməkdaşlıq üzrə yüksək səviyyəli iclasın keçirildiyini xatırladan nazir bu görüşün əlaqələrin cari səviyyəsinin nəzərdən keçirilməsi, sülh və təhlükəsizliyin gücləndirilməsi üzrə daha sıx əməkdaşlıq istiqamətində yeni imkanlar yaratdığını söyləyib.
E.Məmmədyarov deyib: "İƏT-in də üzvü olan Azərbaycan, Qazaxıstan, Qırğızıstan və Türkiyəni özündə birləşdirən Türkdilli Dövlətlərin Əməkdaşlıq Şurası regional təşkilat kimi İƏT yanında müşahidəçi statusu almaq üçün müraciət edib. Türkdilli Dövlətlərin Əməkdaşlıq Şurasının fəaliyyətdə olan sədri kimi Azərbaycan inanır ki, regional əməkdaşlıq mexanizmi olaraq bu qurumun müşahidəçi statusu əldə edərək İƏT-in fəaliyyətində iştirakı hər iki təşkilatın bölüşdüyü birgə məqsədlərin həyata keçirilməsinə töhfə verəcək".
Bütün xəbərlər Facebook səhifəmizdə
USD
EUR
GBP
RUB