Milli Şuranın dünən keçirilən mitinqi ilk növbədə say etibarilə diqqət çəkən idi. Belə ki, şura üzvləri mitinqə 20 min şəxs çıxaracaqlarını açıqlasalar da, orta hesabla mitinqə 3-5 min arası iştirakçı toplandı. Hətta rəqəmlərin daha aşağı olduğu da deyilir. Digər tərəfdən, mitinqdə səslənən şüarların və fikirlərin də uzun illər təkrar olunan eyni sözlər olması baxımdan diqqəti cəlb edirdi. SİA-nın məlumatına görə, sözügedən mitinqi parlamentdə əksəriyyəti təmsil edən hakim Yeni Azərbaycan Partiyasının (YAP) icra katibinin müavini, millət vəkili Siyavuş Novruzov Publika.Az-a açıqlamasında dəyərləndirib. O, dünənki mitinqi piket, yaxud da sürücülük məktəbinin qarşısında bir qrup insanın toplanışı, söhbəti kimi qiymətləndirib.
Onun sözlərinə görə, mitinq insan dalğası, kütləsinin iştirakı deməkdir: "Burda 300-400-dən artıq adam yox idi. Bir vəzifəli şəxsin toyunda, yaxud yasında bundan iki dəfə artıq adam iştirak edir. Bütövlükdə "Milli Şura"ya toplaşan partiyalar, qurumlar, cəmiyyətlərin- onlar adlarını dəyişsələr də, mahiyyətləri eynidir, eyni adamlardır, dünənki mitinq kimi mitinq tarixində biabırçı mitinq olmamışdı. Bu səviyyədə təşkilatçılıq olmayıb. Bilmirdilər ki, şüar nədir. Biri A deyir, biri B deyir".
S.Novruzov mitinqin aparıcısı İbrahim İbrahimlini də tənqid edib. Bildirib ki, mitinqi o aparacaq idisə, qabaqcadan qaynanmış süd, yaxud yumurta içirəydilər ki, səsi açılsın: "Digər çıxışların da hamısının mahiyyəti eyni idi. 20-25 il bundan qabaq nə danışırdılarsa, eyni fikirlər idi. Mitinqə bir saat qalmış mən orada idim. Bütün nəqliyyat vasitələri işləyirdi. Amma onlar iddia edirlər ki, guya nəqliyyat vasitələri işləməyib, bölgələrdən, xüsusilə də Sumqayıtdan gələnlərin qarşısı alınıb. Axı bu necə ola bilər? Cəbhəçilərin, yaxud müsavatçıların kimlikləri alınlarında yazılmamışdı ki, onları avtobusdan düşürsünlər. Yaxud Sumqayıtdan gələnlərin mitinqə gəldiyini kim bilirdi? Hər gün 500 avtobus Bakı-Sumqayıt marşrutu ilə gedib-gəlir. Bunların hamısı yalan məlumatlardır. Keçmişdə Nemət Pənahlı deyirdi oturun, durun, oturmayan ermənidir. Eyni təfəkkürlə bu gün Azərbaycan cəmiyyətində kütləvi aksiyanı həyata keçirmək olmaz. Orda bir qrup qohum-əqrəba gənclərdən başqa heç kim yox idi. Bir qrupu jurnalistlər idi, bir hissəsi təhlükəsizlik orqanlarının nümayəndələri. 300-400 nəfər də onların öz ətrafları, orda çalışan insanlar idi".
S.Novruzov hesab edir ki, mitinqə bir nəfər molla da çağırılmalı idi ki, "Milli Şura"nın fatihəsini versin. Onun sözlərinə görə, respublika səviyyəli olmadığı üçün Qafqaz Müsəlmanları İdarəsindən hansısa hörmətli şəxsi dəvət etmək olmazdı: "Bir rayon, kənd mollası səviyyəsində molla çağırmalı idilər ki, onların fatihəsini oxusun. Hesab edirəm ki, dünən orda "Milli Şura"nın fatihəsi verildi. Azərbaycan cəmiyyəti bunları ömrü boykot edib tarixin arxivinə göndəribdir. Bunlarsa gəlib orda-burda ortaya çıxıb özlərinin varlığını sübut etməyə çalışırlar. Bir dənə İsa Qəmbər düz danışaraq dedi ki, 20 ildir küçələrdə, meydanlardayıq. Hesab edirəm ki, İsa Qəmbər bundan sonra da qalan həyatının siyasi dövrünü küçələrə həsr edəcək".
Bütün xəbərlər Facebook səhifəmizdə
USD
EUR
GBP
RUB