"Nyu-Yorkda, Birləşmiş Millətlər Təşkilatının binasında, BMT-nin Baş katibi Pan Gi Munla Asiya Siyasi Partiyalarının Beynəlxalq Konfransının (İCAPP) Daimi Komitəsinin üzvlərinin görüşü keçirilib". SİA-nın məlumatına görə, bu barədə yap.org.az saytına həmin görüşdə iştirak edən Yeni Azərbaycan Partiyası (YAP) beynəlxalq əlaqələr şöbəsinin müdiri, Milli Məclisin deputatı Asəf Hacıyev deyib.
A.Hacıyevin sözlərinə görə, görüşdə BMT-nin Baş katibi Pan Gi Mun təşkilatın fəaliyyəti və gələcək planları haqda məlumat verib. Eyni zamanda, İCAPP-ın fəaliyyəti, quruma BMT-də müşahidəçi statusunun verilməsi məsələsi və bu istiqamətdə görülməli işlər müzakirə olunub. Pan Gi Mun qeyd edib ki, bu istiqamətdə İCAPP-a daxil olan ölkələr hökumət səviyyəsində bu məsələyə dəstəyi gücləndirməlidirlər. Eyni zamanda, baş katib Suriyada yaranmış vəziyyət, hazırda dünyada baş verən ekstremizm halları haqda BMT-nin narahatlığını bildirib.
Görüş zamanı A.Hacıyev Pan Gi Muna sualla müraciət edib. O, 1993-cü ildə dünyanın ən nüfuzlu təşkilatı olan BMT-nin Təhlükəsizlik Şurasının Ermənistan – Azərbaycan, Dağlıq Qarabağ münaqişəsi haqqında qəbul etdiyi 4 qətnaməsini xatırladıb və qeyd edib ki, həmin sənədlərin bu günə qədər kağız üzərində qalması Azərbaycan xalqını narahat edir və bölgədə vəziyyəti gərginləşdirərək yeni müharibənin başlanma riskini artırır. Eyni zamanda, YAP-ın nümayəndəsi baş katibə müraciət edərək deyib ki, BMT-nin qəbul etdiyi qərarların həyata keçirilməsi üçün yeni mexazmin yaradılması artıq zamanın tələbidir.
Suala cavab olaraq, Pan Gi Mun Dağlıq Qarabağ probleminə toxunaraq ATƏT-in Minsk qrupunun fəaliyyətini qeyd edib və etiraf edib ki, bu məsələdə BMT öz fəaliyyətini daha da gücləndirməlidir.
Görüşdə iştrak edən İCAPP-ın qurucularından biri və hal-hazırda onun həmsədri olan Xose de Venezia Azərbaycanın haqlı olduğunu ifadə edərək, Dağlıq Qarabağ məsələsində ölkəmizin ədalətli mövqeyini dəstəkləyib.
Qeyd edək ki, görüşdə həmçinin, İCAPP-ın digər həmsədri Eu Yong Çunq, təşkilatın xüsusi məruzəçisi Müşahid Hüseyn Səyid (Pakistan) və İCAPP DK-nin üzvləri Şarma Oli (Nepal), Theo Sambuaga (İndoneziya) və Suos Yara (Kamboca) iştirak ediblər. İCAPP-a Asiyanın 330 siyasi partiyası və bu qurumu idarə edən Daimi Komitəyə 18 siyasi partiyanın nümayəndələri və iki həmsədri daxildir. Yeni Azərbaycan Partiyası təşkilatın Daimi Komitəsinin üzvüdür.
Bütün xəbərlər Facebook səhifəmizdə
USD
EUR
GBP
RUB