"ATƏT Parlament Assambleyasının sessiyasında Azərbaycanın Rəqəmsal İnkişaf Şurasının fəaliyyəti barədə məlumatın təqdim olunması olduqca vacib hadisədi. Çünki məlumatsızlıq bir sıra hallarda Avropa istitutlarında həyata keçirilən fəaliyyətlə bağlı yanlış təsəvvürlərin formalaşmasına və ya görülən fəaliyyəti yanllış təqdim etməyə səbəb olur".
Bu sözləri SİA-ya açıqlamasında politoloq Yusif Bağırzadə deyib.
Onun sözlərinə görə, bu cür təqdimatlar dövlətin rəqəmsal inkişaf üzrə strateji yanaşmasını və institusional modelini nümayiş etdirmək məqsədi daşıyır: "Azərbaycanın Rəqəmsal İnkişaf Şurası çərçivəsində həyata keçirilən fəaliyyətlər əsasən rəqəmsal idarəetmənin təkmilləşdirilməsi, elektron xidmətlərin genişləndirilməsi, informasiya təhlükəsizliyinin gücləndirilməsi və rəqəmsal iqtisadiyyatın inkişafına yönəlib. Bu yanaşma müasir beynəlxalq tendensiyalarla uzlaşır, çünki bir çox ölkələrdə rəqəmsal transformasiya artıq ayrı-ayrı qurumlar arasında parçalanmış deyil, mərkəzləşdirilmiş və koordinasiyalı idarəetmə modeli ilə həyata keçirilir.
Belə strukturların yaradılması dövlət idarəçiliyində çevikliyi artırmaq, qərarların icrasını sürətləndirmək və rəqəmsal layihələrin paralel deyil, vahid strategiya çərçivəsində həyata keçirilməsini təmin etmək məqsədi daşıyır. Xüsusilə süni intellekt, böyük verilənlər və kibertəhlükəsizlik kimi sahələrdə koordinasiyalı siyasət daha effektiv nəticələr verir, çünki bu istiqamətlər bir-biri ilə sıx bağlıdır və kompleks yanaşma tələb edir.
ATƏT kimi beynəlxalq təşkilat platformasında bu mövzunun müzakirəsi həm də Azərbaycanın rəqəmsal inkişaf modelinin beynəlxalq dialoqa açıq olduğunu göstərir. Bu, eyni zamanda ölkənin öz təcrübəsini paylaşmaq və digər dövlətlərin təcrübəsindən yararlanmaq niyyətini əks etdirir. Rəqəmsal transformasiya artıq yalnız daxili inkişaf məsələsi deyil, həm də qlobal əməkdaşlıq və standartların formalaşdığı sahəyə çevrilib.
Digər tərəfdən, müasir dövrdə rəqəmsal siyasətin gündəmə gətirdiyi əsas çağırışlar sırasında informasiya təhlükəsizliyi və dezinformasiya ilə mübarizə xüsusi yer tutur. Rəqəmsal platformaların sürətli inkişafı informasiya axınını asanlaşdırsa da, eyni zamanda yanlış məlumatların yayılması riskini də artırır. Buna görə də bir çox ölkələr rəqəmsal idarəetmə sistemlərini gücləndirir və institusional mexanizmləri təkmilləşdirirlər.
Ümumilikdə, Azərbaycanın Rəqəmsal İnkişaf Şurasının beynəlxalq səviyyədə təqdim olunması ölkənin rəqəmsal islahatlar istiqamətində sistemli yanaşma tətbiq etdiyini göstərir".
Bütün xəbərlər Facebook səhifəmizdə
USD
EUR
GBP
RUB
