“Prezident İlham Əliyev-in Azərbaycan–Çexiya iqtisadi əməkdaşlığı ilə bağlı səsləndirdiyi fikirlər iki ölkə arasında münasibətlərin inkişaf perspektivlərinə dair mühüm istiqamətləri əks etdirir. Bu yanaşma mövcud əlaqələrin daha da genişləndirilməsi və yeni sahələr üzrə dərinləşdirilməsi zərurətini ön plana çıxarır”.
Bu sözləri SİA-ya açıqlamasında Milli Məclisin iqtisadi siyasət, sənaye və sahibkarlıq komitəsinin sədr müavini Azər Badamov bildirib.
Onun sözlərinə görə, hazırkı mərhələdə əməkdaşlıq əsasən enerji sektoru üzərində qurulmuşdur:
”Lakin qlobal iqtisadi transformasiyalar, xüsusilə də enerji bazarlarında baş verən dəyişikliklər göstərir ki, uzunmüddətli və dayanıqlı tərəfdaşlıq üçün iqtisadi əlaqələrin şaxələndirilməsi vacibdir. Bu baxımdan sənaye, texnologiya, logistika və xidmət sahələri yeni əməkdaşlıq istiqamətləri kimi çıxış edə bilər.
Çexiya sənaye və yüksək texnologiyalar sahəsində inkişaf etmiş ölkə kimi tanınır. Bu amil Azərbaycan üçün texnologiya transferi, innovativ istehsal sahələrinin yaradılması və sənaye potensialının artırılması baxımından geniş imkanlar yaradır. Xüsusilə rəqəmsallaşma, “ağıllı istehsal” və startap ekosisteminin inkişafı istiqamətində əməkdaşlıq hər iki tərəf üçün qarşılıqlı fayda vəd edir.
Digər tərəfdən, Azərbaycan son illərdə regionda mühüm nəqliyyat və logistika mərkəzinə çevrilməkdədir. Şərq-Qərb və Şimal-Cənub nəqliyyat dəhlizlərinin inkişafı ölkənin tranzit potensialını əhəmiyyətli dərəcədə artırmışdır. Bu isə Çexiya şirkətləri üçün yeni bazarlara çıxış imkanları yaradır və onların regionda iqtisadi fəaliyyətini genişləndirmək üçün əlverişli platforma formalaşdırır.
Bununla yanaşı, turizm, kənd təsərrüfatı, yaşıl enerji və investisiya sahələrində əməkdaşlığın genişləndirilməsi də xüsusi əhəmiyyət kəsb edir. Turizm sahəsində qarşılıqlı turist axınının artırılması, kənd təsərrüfatında müasir texnologiyaların tətbiqi və alternativ enerji layihələrində birgə iştirak iqtisadi əlaqələrin daha balanslı və dayanıqlı inkişafına töhfə verə bilər.
Eyni zamanda, birgə biznes forumlarının keçirilməsi, sahibkarlar arasında birbaşa əlaqələrin qurulması və investisiya mühitinin daha da yaxşılaşdırılması iqtisadi əməkdaşlığın institusional əsaslarını gücləndirə bilər. Bu istiqamətdə dövlət səviyyəsində yaradılan platformalar və təşviq mexanizmləri mühüm rol oynayır.
Dövlət başçısının vurğuladığı kimi, Azərbaycan və Çexiya arasında iqtisadi əməkdaşlığın şaxələndirilməsi üçün geniş potensial mövcuddur. Bu potensialın effektiv şəkildə reallaşdırılması isə qarşıdakı dövrdə prioritet vəzifələrdən biri olaraq qalır və hər iki ölkə üçün uzunmüddətli iqtisadi faydalar vəd edir”.
Bütün xəbərlər Facebook səhifəmizdə
USD
EUR
GBP
RUB
