"Prezident İlham Əliyevlə İran Prezidenti Məsud Pezeşkian arasında baş tutan telefon danışığı Azərbaycan–İran münasibətlərinin hazırkı mərhələdə yalnız ikitərəfli çərçivədə deyil, daha geniş regional kontekstdə dəyərləndirildiyini göstərir. Bu təmas, xüsusilə bölgədə artan geosiyasi gərginlik fonunda Bakının məsuliyyətli və balanslı xarici siyasət xəttinin növbəti praktik ifadəsi kimi çıxış edir".
Bu sözləri SİA-ya açıqlamasında politoloq Tofiq Abbasov deyib.
Onun sözlərinə görə, rəsmi Bakı Tehranla münasibətlərdə dostluq, qardaşlıq və mehriban qonşuluq prinsiplərini ardıcıl şəkildə ön plana çəkir: "Tarixi, etnik və dini bağların vurğulanması təsadüfi deyil və bu, münasibətlərin situativ deyil, dərin sosial-sivilizasiya əsaslarına söykəndiyini nümayiş etdirir. Dövlət başçılarının qarşılıqlı səfərlərinin və aparılan danışıqların xatırladılması isə son illərdə münasibətlərdə müşahidə olunan müsbət dinamikanın davam etdirilməsi niyyətindən xəbər verir. Telefon danışığında Araz çayı üzərində Ağbənd–Kəlalə avtomobil körpüsünün tikintisinə xüsusi diqqət ayrılması iqtisadi və nəqliyyat əməkdaşlığının siyasi dialoqu tamamlayan əsas dayaqlardan biri olduğunu göstərir. Bu layihə təkcə iki ölkə arasında əlaqələrin möhkəmlənməsi deyil, eyni zamanda regionda kommunikasiya xətlərinin açılması və qarşılıqlı asılılığın artırılması baxımından strateji əhəmiyyət daşıyır. Belə layihələr siyasi etimadın praktik müstəvidə təsdiqi kimi qiymətləndirilə bilər. Xüsusilə diqqətçəkən məqam Prezident İlham Əliyevin bölgədə yaranmış gərginliklə bağlı narahatlığını ifadə etməsi və Azərbaycanın bu gərginliyin aradan qaldırılmasına töhfə verməyə hazır olduğunu bəyan etməsidir. Bu mövqe Azərbaycanın artıq passiv müşahidəçi deyil, regional sabitliyə töhfə verən aktor kimi çıxış etdiyini göstərir. Bakı açıq şəkildə münaqişələrin güc yolu ilə deyil, dialoq və qarşılıqlı anlaşma əsasında həllinin tərəfdarı olduğunu vurğulayaraq, özünü etibarlı vasitəçi və konstruktiv tərəfdaş kimi təqdim edir.
Bu telefon danışığı Bakı–Tehran münasibətlərində etimadın möhkəmləndirilməsi istiqamətində atılmış mühüm addım olmaqla yanaşı, Azərbaycanın Cənubi Qafqaz–Yaxın Şərq geosiyasi xəttində artan diplomatik rolunu da ortaya qoyur. Azərbaycan bir tərəfdən milli maraqlarını qoruyur, digər tərəfdən isə regionda gərginliyin azalmasına yönəlmiş təşəbbüslərlə beynəlxalq nüfuzunu gücləndirir. Prezident İlham Əliyevlə Prezident Məsud Pezeşkian arasında baş tutan bu telefon danışığı Azərbaycan–İran münasibətlərinin praqmatik, qarşılıqlı hörmətə əsaslanan və gələcəyə hesablanmış xarakter daşıdığını göstərir. Bu təmas, eyni zamanda, Azərbaycanın regional diplomatiyada sabitləşdirici və dialoqyönlü rolunun daha da möhkəmləndiyini təsdiqləyən mühüm siyasi siqnal kimi qiymətləndirilə bilər".
Bütün xəbərlər Facebook səhifəmizdə
.jpg "Generaldan müharibə xəbərdarlığı! - Nə Baş Verir?")
USD
EUR
GBP
RUB