"Azərbaycanın son illərdə regional güc kimi mövqeyinin güclənməsi bir neçə əsas strateji amilin və məqsədyönlü dövlət siyasətinin nəticəsidir. Əvvəla, ölkənin siyasi sabitliyi, idarəetmənin çevikliyi və prezidentlik institutunun yüksək manevr qabiliyyəti Azərbaycanın regional proseslərdə proaktiv mövqe tutmasına imkan yaradıb. 2020-ci il Vətən müharibəsindən sonra yaranan yeni geosiyasi reallıq isə Azərbaycanın hərbi-siyasi çəkisini artıraraq onu Cənubi Qafqazın təhlükəsizlik memarlığını müəyyən edən aparıcı aktora çevirib". Bu sözləri SİA-ya açıqlamasında politoloq Züriyyə Qarayeva deyib.
Onun sözlərinə görə, ordunun modernləşdirilməsi, hərbi sənaye potensialının genişlənməsi və müdafiə ittifaqlarındakı möhkəmlənmə də Bakının çəkisini daha da artırır:
"Eyni zamanda Azərbaycanın enerji siyasəti onun regional güc kimi tanınmasında həlledici rol oynayır. Cənub Qaz Dəhlizi, TANAP və TAP kimi layihələr ölkəni Avropanın enerji təhlükəsizliyində əsas tərəfdaşa çevirib. Xəzər dənizində yaşıl enerji potensialının istifadəyə verilməsi, həmçinin Azərbaycan–Türkiyə–Avropa enerji xəttinin genişlənməsi ölkənin strateji əhəmiyyətini daha da yüksəldir. Azərbaycan artıq təkcə neft və qaz ixracatçısı deyil, həm də enerji tranzit mərkəzidir.
Azərbaycanın nəqliyyat-logistika xəritəsindəki mövqeyi də regional güc statusunu gücləndirən amillərdən biridir. Orta Dəhliz, Bakı–Tbilisi–Qars xətti, Ələt Limanı və yeni Zəngəzur bağlantısı ölkəni Avrasiyanın ticarət sistemində əsas tranzit qovşağına çevirib. Mərkəzi Asiya ölkələrinin Avropaya çıxışında Azərbaycanın əvəzsiz rol oynaması həm region dövlətlərinin, həm də Qərb və ABŞ kimi qlobal oyunçuların Bakıya marağını artırır.
Beynəlxalq təşkilatların Azərbaycana artan marağının səbəbləri də məhz bu amillərlə bağlıdır. Azərbaycan həm enerji, həm nəqliyyat, həm də təhlükəsizlik baxımından etibarlı tərəfdaş kimi çıxış edir və çoxşaxəli xarici siyasət yürüdür. Ölkənin balanslaşdırılmış diplomatiyası, NATO, Aİ, Türk Dövlətləri Təşkilatı, BMT və Qoşulmama Hərəkatı ilə paralel əməkdaşlığı Bakını dialoq üçün ideal platformaya çevirir. Bundan başqa, Azərbaycanın humanitar missiyalarda, multikulturalizm siyasətində və irimiqyaslı beynəlxalq tədbirlərdə fəal iştirakı onun beynəlxalq imicini gücləndirmiş, regional lider statusunu möhkəmləndirmişdir.
Nəticə etibarilə, Azərbaycanın yüksələn regional gücü tək bir sahənin deyil, hərbi, enerji, nəqliyyat, diplomatiya və təhlükəsizlik vektorlarının sintezinin məhsuludur və bu dinamika qarşıdakı illərdə ölkənin strateji çəkisinin daha da artacağını göstərir".
Bütün xəbərlər Facebook səhifəmizdə
USD
EUR
GBP
RUB
