ABŞ Təhsilli Azərbaycan Məzunları İctimai Birliyi ADA Universitetində Azərbaycan Biznes Keys müsabiqəsinin final mərhələsini keçirib. SİA-ya ABŞ-ın Bakıdakı səfirliyindən verilən məlumata görə, bu il müsabiqə SOCAR AQŞ, British American Tobacco (BAT), Azercell, BP və digər şirkətlər, həmçinin ABŞ dəfirliyi və ADA Universitetinin təşkilati dəstəyi ilə həyata keçirilib.
Azərbaycan Biznes Keys müsabiqəsi universitetlərin maliyyə, biznes, iqtisadiyyat sahəsində təhsil alan bakalavr və magistr tələbələri arasında keçirilən ən prestijli biznes müsabiqələrindən biridir. Yarışmada analiz üçün tələbələrə real həyatda şirkətlərin qarşılaşdıqları biznes problemləri əsasında yazılmış Harvard Business School-un keysləri təqdim edilib. Bütün komandalar beş həftə ərzində biznes analizi, strategiyanın qurulması, təqdimat etmək bacarığı və s. mövzularda təlimlər keçiblər. Bununla yanaşı komandalar final mərhələsindən öncə sınaq təqdimatlarında iştirak ediblər.
Müsabiqədə iştiraka 7 ali məktəbdən- ADA, Qafqaz, Azərbaycan Dövlət İqtisad, Xəzər və Azərbaycan Universitetləri, Azərbaycan Respublikası Dövlət Gömrük Komitəsinin Akademiyası və Bakı Ali Neft Məktəbini təmsil edən 27 komanda qoşulsa da, onlardan yalnız 14-ü yarımfinal mərhələsinə çıxmağa nail olub, 4 komanda isə final mərhələsinə çıxıb. Müsabiqənin qalibləri ADA Universitetinin tələbələri Aida Orucova, Fəridə Əsgərova, Leyla Hüseynzadə və Nərminə Bəylərova 6 min manat pul mükafatı qazanıblar. ABŞ Təhsilli Azərbaycan Məzunları İctimai Birliyi Azərbaycanda ABŞ Dövlət Departamentinin təhsil mübadilə proqramlarının, Azərbaycan gənclərinin xarici ölkələrdə təhsili üzrə Dövlət Proqramı və ABŞ Universitetlərinin təqaüd proqramlarının dəstəyi ilə ABŞ-da təhsil almış məzunları birləşdirən qeyri-hökumət təşkilatıdır. Birlik, bütün məzunları toplayaraq, öz bilik və bacarıqları ilə inkişaf edən Azərbaycana kömək etmək məqsədilə 2003-cü ilin oktyabrında yaradılıb.
Bütün xəbərlər Facebook səhifəmizdə
USD
EUR
GBP
RUB