"İrana tətbiq edilmiş sanksiyaların aradan götürülməsi məlumatı hələ real deyil. Sadəcə müəyyən təşəbbüslər var. Konkret olaraq ortada heç nə yoxdur". Bu sözləri SİA-ya açıqlamasında iqtisadçı ekspert Samir Əliyev İrana tətbiq edilmiş sanksiyaların aradan qaldırılması ilə bağlı danışarkən deyib.
İqtisadçı bildirib ki, istiqamət sanksiyaların çıxarılmasına doğru gedir.
Məsələnin Azərbaycana göstərə biləcək təsirindən danışan ekspert söyləyib ki, İranın sanksiyalardan çıxması Azərbaycanın bölgədəki strateji əhəmiyyətini azaldır: "Lakin yeni bir yanaşma da tətbiq oluna bilər. Azərbaycan neft-qaz ölkəsidir və Avropanın qaz təminatında müəyyən bir rola sahibdir. İran isə ən böyük neft yatağına sahib olan ölkə kimi dəyərləndirilir. Məhz buna görə də, sanksiyaların aradan qaldırılması dünya bazarında neftin düşməsinə səbəb ola bilər. Bu halda Azərbaycan qazına da tələbat azala bilər. Azərbaycanın qaz kəməri onsuzda çəkiləcək. Bu sahədə heç bir dəyişiklik olmayacaq. Sadəcə mövcud situasiyada baş verə biləcək geosiyasi dəyişiklikləri öz xeyrimizə dəyişməliyik. Əvvəla Avropa ölkələri ilə münasibətləri yaxşılaşdırmağa davam etməlidir. İkincisi İranın neft sənayesinə daxil olmalıyıq. Azərbaycanın SOCAR timsalında İran neft bazarına daxil ola bilməsi bir nömrəli prioritet sahə olmalıdır. İran yataqlarının işlənməsində hansısa fonda çıxış etməlidir".
S. Əliyev qeyd edib ki, sanksiyaların aradan qaldırılması əslində siyasi cəhətdən bizim xeyrimizə yozula bilər: "Bütün bu məsələlərə diqqət yetirilsə, mövcud risklər aradan qaldırılmış olar. İranla münasibətlərin yoluna qoyulması, əslində Azərbaycan üçün çox xeyirlidir. Əgər hər hansı bir hücum və ya nüvə silahından istifadə halı həyata keçsəydi, bu Azərbaycan üçün çox böyük fəlakət olardı. Siyasi baxımdan bu məsələ bizim üçün müsbət bir haldır, iqtisadi cəhətdən isə bəzi riskləri imkanlara çevirmək lazımdır".
Bütün xəbərlər Facebook səhifəmizdə
USD
EUR
GBP
RUB