Azərbaycan Respublikasının Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən Xaçmaz rayonu, Qaraqurdlu kəndində yerləşən "Müasir Gənclər" MMC-də pasterizə olunmayan açıq rəngli pivənin istehsalına dövlət nəzarəti həyata keçirilib.
Standartlaşdırma üzrə dövlət nəzarəti xidmətindən SİA-ya verilən məlumata görə, araşdırma zamanı müəyyən olunub ki, pivə AZS 143-2005 dövlət standartının tələblərinə uyğun olmayaraq istehsal olunub. Belə ki, eyni zamanda sanitariya norma və qaydalarına riayət edilmədən, texnoloji təlimat və resepturalar olmadan istehsal olunub. Müəssisədə hazır məhsulun sınaqlarını aparmaq üçün laboratoriya mövcud deyil, istehsal sahələri gigiyenik norma və qaydalara cavab vermir, sabit keyfiyyətdə məhsul istehsalı üçün şərait yoxdur, istismar olunan ölçmə vasitələri müqayisəli dövlət yoxlanışından keçmədən istifadə olunub.
Bundan başqa müəyyən olunub ki, istifadə olunan avadanlıqların istismar müddəti bitib və istehsal üçün yararsız halda istifadə olunaraq məhsulun texnoloji prosesdə duz məhlulu ilə qarışması ilə nəticələnib. Hazırlanan pivə vaxtından tez, yəni yetişmədən istehsaldan çıxarılıb. Bununla da tonlarla pivə insan həyatı və sağlamlığı üçün təhlükəli halda istehsal olunub. Dövlət nəzarəti tədbiri zamanı müəssisədə heç bir sınağı aparılmayan, ekstraktivliyi və tündlük faizi təyin olunmayan 2 ədəd 20 tonluq çəndə məhsul aşkar edilib.
Aşkar olunan qanun pozuntuları ilə bağlı "Müasir Gənclər" MMC-də pivə istehsalı və satışı qadağan edilib.
Mənzər Ərçəqızı
Bütün xəbərlər Facebook səhifəmizdə
USD
EUR
GBP
RUB