Yola saldığımız 2015-ci il "Xəzər Lənkəran" akademiyası üçün istər nəticə, istər yetirmələrin əsas heyətdə çıxışı, istərsə də onların milli komandalara cəlb olunması baxımından ən uğurlu il olub. SİA-nın məlumatına görə, hazırda Gənclər İnkişaf Proqramının koordinatoru İlhan Akgülün ümumi rəhbərliyi altında "Xəzər Lənkəran"ın bütün yaş qrupları öz qruplarında liderlər sırasında yer alıb.
Hafiz Əliyevin rəhbərlik etdiyi U-19 komandası hazırda 23 xalla 3-cü pillədə qərarlaşıb. U-19 liqasında ən az qol buraxan (6 top) komanda məhz "Xəzər Lənkəran"dır. Komandanıı ilk pillədən 5 xal ayırır.
Ağadadaş Həmidovun başçılıq etdiyi U-17 qrupu hazırda 23 xalla 5-ci pillədədir. Lakin dünən AZAL-a qarşı keçirilməli qarşılaşma rəqibin oyuna gəlməməsi səbəbindən baş tutmadığı üçün "Xəzər Lənkəran"ın ili 26 xalla 4-cü pillədə başa vurduğunu deyə bilərik. Aparıcı oyunçular İbrahim Qədirzadə və Yusif Həsənovun əvəzedici və əsas komandalar, həmçinin U-17 milli komandasının heyətinə cəlb edilməsi bu qrupun nəticələrinə bir qədər təsir göstərsə də, ümumilikdə nəticəni ürəkaçan hesab etmək olar.
Namiq Qarayevin rəhbərlik etdiyi U-16 komandası 24 xalla 3-cü pillədədir. İlk pillə ilə xal fərqi böyük olsa da, ikinci yerdən komandanı 4 xal ayırır. Bu qrupdan da Xəqani Sadıqov, Nurlan Fərəcli və Sübhan Məmmədli kimi aparıcı futbolçuların vaxtaşırı əvəzedici komandaya cəlb olunduğunu qeyd etmək lazımdır.
Bu mövsüm ən uğurlu çıxış edən qrup isə U-15 komandasıdır. Mircəlal Əliyevin yetirmələri hazırda 49 xalla 2-ci yerdə qərarlaşıblar. Qeyd edək ki, sıx oyun qrafikinə malik bu liqada ilin son turunun oyunları bugün keçirilib. 16 qələbə, 1 heç-heçə, 2 məğlubiyyət, 66 vurulan və 6 buraxılan top – U-15 komandasının hazırki statistikası belədir. Komandanın futbolçusu Tural Bayramov isə 27 qolla çempionatın bombardirlər siyahısına başçılıq edir.
Regional liqalarda çıxış edən kiçik yaş qrupları da ili müsbət notlarda başa vurub. U-10, U-12, U-13 və U-14 komandaları 1-ci pillədə, U-11 komandası isə 2-ci pillədə qərarlaşıb.
Bu il "Xəzər Lənkəran" futbolçularının milli komandanın müxtəlif qruplarına çağırılması da yadda qalıb. Cari ildə rekord sayda "Xəzər Lənkəran" yetirməsi təlim-məşq toplanışlarında və rəsmi matçlarda Azərbaycan millisinin şərəfini qoruyub. İlyas Səfərzadə (U-21 milli komandası), Heydər Babayev (U-19 milli komandası), İbrahim Qədirzadə, Yusif Həsənov, Kamal Dənziyev və Kənan Həsənov (hamısı – U-17 milli komandası), Cəlal Hüseynzadə (U-18 milli komandası), Fərid Əsədov və Maqsum Qəmbərli (U-20 milli komandası) bu il ərzində millinin müxtəlif yaş qruplarına dəvət olunan "Xəzər Lənkəran" yetirmələridir.
Elnur Cəfərov isə bu il ərzində U-19, U-21 və "A" milli komandasının heyətində forma geyinməklə yadda qalıb. Əsas millinin heyətində oyuna çıxan ilk "Xəzər Lənkəran" yetirməsi məhz E.Cəfərov olub. Bir müddət sonra isə daha bir "Xəzər Lənkəran" yetirməsi Elşən Rzazadə əsas milliyə dəvət alıb.
Bütün xəbərlər Facebook səhifəmizdə
USD
EUR
GBP
RUB