Epşteyn sənədləri Fransanı silkələyib, keçmiş nazirin rəhbərlik etdiyi instituta polis basqını olub.
SİA xarici KİV-ə istinadən xəbər verir ki, Epşteyn sənədlərinin Fransadakı əks-sədaları davam edir. Sənədlərdə adı hallanan və barəsində korrupsiya və çirkli pulların yuyulması ittihamları ilə ilkin istintaq başladılan keçmiş mədəniyyət naziri Jack Langın bir dövr rəhbərlik etdiyi Arap Dünyası İnstitutunda polis axtarış aparıb.
Milli mətbuatın Fransa Milli Maliyyə Prokurorluğunun açıqlamasına istinadən verdiyi xəbərlərə görə, fevralın 6-da keçmiş Fransa mədəniyyət naziri Jack Lang və onun qızı Caroline Lang barəsində korrupsiya və çirkli pulların yuyulması ittihamları ilə başlanmış ilkin istintaq çərçivəsində institut da daxil olmaqla bir sıra ünvanlarda polis tərəfindən axtarışlar həyata keçirilib.
ABŞ-də azyaşlı qızlara qarşı cinsi istismar və fahişəlik şəbəkəsi qurmaq ittihamı ilə həbsdə saxlanılarkən həbsxanada ölü tapılan milyarder Jeffrey Epsteinlə bağlı açıqlanan sənədlərdə adı keçən keçmiş nazir Lang haqqında Epşteynlə maliyyə əlaqələri səbəbilə ilkin istintaq açılmışdı. Lang fevralın 7-də institutdakı sədr vəzifəsindən istefa vermişdi.
Keçmiş nazir Jack Langın adı Epşteyn işi üzrə yayımlanan sənədlərdə 600-dən çox dəfə çəkilir. Sənədlərə əsasən, Lang Epşteynə Parisdə müxtəlif mədəni turlar təklif edib. Epşteyn isə Langın 2017-ci ilin aprelində Mərakeşə səfəri üçün öz təyyarəsini ona istifadəyə verib.
Müstəqil media qurumunun araşdırmasına görə, Epşteynin 2016-cı ildə ABŞ-yə bağlı və “vergi cənnəti” kimi tanınan Virgin adalarında qurduğu şirkətin səhmlərinin yarısı Langın qızı Caroline Langa məxsus olub.
Adı Epşteyn dosyesində 900-dən çox dəfə keçən Caroline Lang bu fakt üzə çıxdıqdan sonra Müstəqil Prodüserlər Birliyində tutduğu baş katib vəzifəsindən istefa verib.
Jeffrey Epşteyn işi: Ən kiçiyi 14 yaşında olmaqla 18 yaşdan aşağı onlarla qız uşağına qarşı cinsi istismar və fahişəlik şəbəkəsi qurmaqda ittiham olunan Epşteyn, Nyu-Yorkdakı Manhattan Metropolitan Həbsxanasında saxlanıldığı kamerada 10 avqust 2019-cu ildə ölü tapılmışdı.
Açıqlanan Epşteyn məhkəmə sənədlərində Böyük Britaniya şahzadəsi, ABŞ prezidenti, keçmiş ABŞ prezidentləri, keçmiş İsrail baş naziri, keçmiş ABŞ vitse-prezidenti, aktyorlar, musiqiçilər, hüquqşünaslar və keçmiş ştat rəhbərləri də daxil olmaqla bir sıra tanınmış şəxslərin adları yer alıb.
ABŞ Federal Təhqiqat Bürosu və ABŞ Ədliyyə Nazirliyinin apardığı araşdırmanın nəticəsində məşhur şəxslərdən ibarət “müştəri siyahısı”nın mövcudluğuna dair heç bir sübut tapılmadığı bildirilib. Açıqlamada qeyd olunub ki, Epşteynin guya nüfuzlu şəxsləri qorumaq məqsədilə öldürüldüyü iddiaları təsdiqini tapmayıb və o, həbsxana kamerasında intihar edib.
Bütün xəbərlər Facebook səhifəmizdə
.jpg "Sənədsiz ev sahiblərinə ŞAD XƏBƏR")
.jpg "İran hər an vurula bilər - ƏN SON DƏQİQƏ")
USD
EUR
GBP
RUB
