Bu il ərzində Azərbaycanda 43,9 mln. ton neft və 27,9 mlrd. kubmetr qaz hasil edilib. SİA-nın məlumatına görə, bunu bu gün Azərbaycan Dövlət Neft Şirkətinin (ARDNŞ) prezidenti Rövnəq Abdullayev ölkəmizin əldə etdiyi uğurlar və ümumilikdə 2012-ci ilin yekunları ilə bağlı hesabatında bildirib. Onun sözlərinə görə, 2012-ci ildə ARDNŞ-in qarşısına qoyulan bütün proqram və tapşırıqlar yerinə yetirilib. 2011-ci ilin yekunları ilə müqayisədə Azərbaycan neft hasilatını 3,7% azaldıb, qaz hasilatını isə 8,1% artırıb.
R.Abdullayev Xəzərin Azərbaycan sektorunda yerləşən "Ümid" yatağında ikinci istismar quyusunun işə salınması haqqında məlumat verib. Qeyd edilib ki, yatağın istismarı nəticəsində ölkənin qaza olan tələbatı uzun müddətdə təmin olunacaq: "Ümid"in sayəsində Azərbaycanın qaza olan tələbatı ən azı 100 il müddətində təmin olunacaq".
ARDNŞ-ın prezidenti həmçinin deyib ki, Xəzərin Azərbaycan sektorunda yerləşən "Abşeron" strukturunda qaz hasilatına 2020-ci ildən başlanacaq: Ümumiyyətlə, 2020-ci ildə Azərbaycandan təbii qaz ixracının potensialı ildə 25 mlrd. kubmetrə, 2025-ci ildə isə 40 mlrd. kubmetrə çatdırılacaq".
"Şahdəniz" layihəsi haqqında da danışan R.Abdullayev deyib ki, layihənin strukturunun işlənməsi üzrə tərəfdaş şirkətlər 2013-cü il üçün büdcəni təsdiq ediblər. Büdcənin həcmi 6 mlrd. dollar təşkil edir: "Bura yeni blokların inşası, qaz boru kəmərinin tikintisi və s. aiddir. Trans-Anadolu qaz kəmərinin (TANAP) tikintisinə isə gələn il başlanılacaq.Ümumilikdə, "Şahbəriz-2" layihəsi 28-30 mlrd. dollara başa gələcək. İlk qazın 2017-ci ilin sonu - 2018-ci ilin əvvəlində nəqlinə başlanacaq".
Hesabatın sonunda R.Abdullayev tərəfindən ARDNŞ-ın vitse-prezidenti Rəhman Qurbanova şöhrət ordeni və digər neft şirkətinin əməkdaşlarına tərəqqi medalları təqdim edilib.
Bütün xəbərlər Facebook səhifəmizdə
USD
EUR
GBP
RUB