“Xocalı faciəsini dünyaya tanıdaq!” FOTOLAR

25 Fevral 2014 17:34 | 878

Xocalı faciəsini gənc nəslə sistemli şəkildə tanıtmaq və Heydər Əliyev Fondunun sədr müavini Leyla Əliyevanın başlatdığı Xocalıya Ədalət kompaniyasına dəstək olmaq məqsədi ilə "Aşıq Şəmşir" Mədəniyyət Ocağı İctimai Birliyi tərəfindən Xəzər rayonunun Mərdəkan qəsəbəsində yerləşən 14 saylı Kəlbəcər rayon orta məktəbində "Xocalı faciəsini dünyaya tanıdaq!" adlı tədbir keçirib. Tədbirdə məktəbin direktoru Tahir Kərimov çıxış edib: "Xocalı faciəsi 200 ildən çox müddətdə Erməni millətçilərinin xalqımıza qarşı apardığı soyqırım siyasətinin qanlı səhifəsidir. Bu soyqırım 22 il əvvəl baş verib. 1992-ci il fevralın 25-dən 26-na keçən gecə Xocalıya hücum başlandı. Hücumda Ermənistanın hərbi birləşmələri, Dağlıq Qarabağdakı erməni terrorçu dəstələri və keçmiş sovet ordusunun Dağlıq Qarabağda yerləşən 366-cı motoatıcı alayı iştirak edirdi. Heç bir hərbi zərurət olmadan şəhər bir neçə saatın içərisində yerlə yeksan edilib".

Sonra Aşıq Şəmşir Mədəniyyət Ocağı İctimai Birliyinin sədr müavini Həbib Misirov çıxış edib: "Xocalı sakini olan 613 nəfər dinc azərbaycanlı, o cümlədən 63 uşaq, 106 qadın işgəncə ilə öldürüldü. 8 ailə bütünlüklə məhv edildi. Beləliklə, son yüz ildən artıq dövrdə erməni xalqının bir neçə nəslinin milli müstəsnalıq, Azərbaycan xalqına qarşı düşmənçilik ruhunda tərbiyə edilməsi nəticə etibarı ilə XX əsrin sonlarında sivil dünyanın gözü qarşısında Xocalı soyqırımı kimi qanlı faciənin baş verməsinə gətirib çıxarıb. Azərbaycan xalqı və onun dövləti Xocalı faciəsini heç vaxt unutmur və unutmayacaq. Ermənilərin Azərbaycan xalqına qarşı törətdiyi Xocalı qətliamı İslam Konfransı Təşkilatının müvafiq qətnaməsində və Meksika, Pakistan, Kolumbiya dövlətlərinin parlamentlərində soyqırım kimi, Texas, Arkanzas, Nyu Cersi, Corcia, Massaçusets, Nyu Meksika ştatlarında kütləvi qətliam kimi tanınıb."

Qeyd edək ki, daha sonra tədbirdə faciənin əks olunduğu videogörüntü nümayiş etdirildi, məktəblilərin ifasında Xocalı faciəsinə həsr edilən şeirlər səsləndirilib və səhnəciklər göstərilib.