Dünən Qətərin paytaxtı Dohada boks üzrə dünya çempionatının yarımfinal mərhələsinə start verilib. SİA-nın məluamtına görə, Azərbaycan milli komandasının üzvü, dünya çempionatının debütantı Abdulqadir Abdullayevin (91 kq) yarımfinalda kubalı Erislandi Savonla ilə gərgin keçən qarşılaşması Kuba boksçusunun üstünlüyü ilə yekunlaşıb və idmançımız dünya çempionatını bürünc medalla başa vurub.
Yarımfinal mərhələsinə yüksələn digər üç boksçumuz isə görüşlərini bu gün keçirəcəklər. Millimizin digər üzvü Elvin Məmişzadə (52 kq) yarımfinalda əlcəzair nümayəndəsi Məhəmməd Flissi ilə döyüşəcək. Dünya və Avropa çempionu Albert Səlimov (60 kq) braziliyalı Robson Donato ilə üz-üzə gələcək. Birinci Avropa Oyunlarının qalibi Pərviz Bağırov (69 kq) isə Danyar Elesuinovla (Qazaxıstan) qarşılaşacaq.
Xatırladaq ki, 52 kiloqram çəki dərəcəsində finalçılar, 60 və 69 kiloqram çəki dərəcələrində ilk üç yerlərin sahibləri "Rio-2016" Yay Olimpiya Oyunlarında iştirak etmək hüququ əldə edəcəklər.
Bütün xəbərlər Facebook səhifəmizdə
USD
EUR
GBP
RUB